Hindi na raw kailangang mag-convene ang Senate impeachment court dahil sa desisyon ng Korte Suprema kaugnay sa inihaing articles of impeachment laban kay Vice President Sara Duterte, ayon kay Senate President Francis "Chiz" Escudero.
Noong Hulyo 25, lumabas ang desisyon ng Korte Suprema kung saan idineklara nito na "unconstitutional" ang articles of impeachment laban sa bise presidente. Bukod dito, iginiit din na walang hurisdiksyon ang Senado sa impeachment proceedings at sa Pebrero 2026 pa muling maaaring mag-file ng impeachment cases laban sa Bise Presidente.
“The SC has ruled that the House impeachment complaint versus VP Sara Duterte is barred by the one-year rule and that due process or fairness applies in all stages of the impeachment process,” saad ni Court Spokesperson Atty. Camille Ting.
TNVS drivers, bibigyan pa rin ng pagkakataon magpaliwanag bago patawan ng penalty–LTFRB Chairman Mendoza
Kaugnay nito, sinabi ni Escudero sa isang press conference nitong Martes, Hulyo 29, na wala nang hurisdiksyon ang impeachment court dahil sa naturang desisyon ng Korte.
"Nakalagay kasi sa desisyon ng Korte Suprema walang jurisdiction ang impeachment court. Walang jurisdiction ang Senado na dinggin pa ang mga Articles of Impeachment," aniya.
"Ang sinasabi ng Korte Suprema sa desisyon nila ngayon ay unconstitutional yung articles of impeachment kaya walang jurisdiction yung Senado. At kapag sumumpa yung mga bagong-halal na senador, they swear to do impartial justice during trial, eh wala na ngang jurisdiction eh," dagdag pa ni Escudero.
Para sa kaniya, mas "safe" raw kung ang Senado ang magpapasya kaugnay sa impeachment case ni Duterte.
"Sa tingin ko, mas safe na Senado ang magpapasya kaugnay nito imbis na impeachment court dahil baka matingnan pa na paglabag ang pag-convene ng impeachment court matapos ang naging desisyon ng Korte Suprema," ani Escudero.
Inilahad pa ng Pangulo ng Senado, bilang halimbawa, ang impeachment case noon ni dating Pangulong Joseph Estrada dahil sa EDSA 2 kung saan Senado raw ang nagdesisyong i-dismiss ang kaso hinggil dito at hindi ang impeachment court.
"Idineklara ng Senado na functus officiona yung impeachment court at dinismiss yung kaso," aniya.
At nang tanungin siya kung hindi na kailangang mag-convene ang impeachment court: "Yes, and if the Senate will act on it, the Senate should act on it as a Senate in plenary.”
Samantala, paglilinaw pa ng Korte Suprema, bagama’t itinuro nilang labag sa konstitusyon ang nasabing articles of impeachment, hindi raw ito nangangahulugang abswelto na siya sa mga kasong kinahaharap niya.
