Muling inangkin ng National University Pep Squad ang korona sa University Athletic Association of the Philippines (UAAP) season 87 Cheerdance Competition nitong Linggo, Disyembre 1, 2024 sa SM Mall of Asia Arena sa Pasay City.
Nasungkit ng NU Pep Squad ang ikawalo nilang titulo sa torneo sa loob ng mahigit isang dekada. Sa iskor na 713 puntos, inagaw ng naturang koponan ang korona sa defending champion na Far Eastern University Cheering Squad na nakopo ang 2nd runner-up ngayon season.
Bukod sa pamamayagpag sa ikaunang puwesto, sinolo rin ng NU Pep Squad ang special awards matapos nilang iuwi ang walong special awards katulad na lamang ng Yamaha Most Unique Dance Move, Most Synchronized Team at Skechers Stylist Performance Team Award.
Pinanindigan ng NU Pep Squad ang tema nilang mala-out of this world routines kung saan malinis na na-execute ng koponan ang dalawang pyramid stunts at “human like” propellers routine.
Amihan, shear line, magpapaulan sa malaking bahagi ng bansa
Samantala, balik podium finish na rin ang San Marcelino based team na Adamson Pep Squad matapos nitong makuha ang 1st runner-up sa iskor na 679.5.
Pumang-apat naman ang Sampaloc squad ng University of the East Pep Squad na may iskor na 641 habang bigo namang maging podium finisher ang University of Santo Tomas Salinggawi Dance troupe na bumaba sa ikalimang puwesto sa iskor na 634.5.
Nasa ikaanim na puwesto naman ang University of the Philippines Pep Squad na may 560 puntos habang muli namang nagsalo sa bottom two ang De La Salle Animo Squad 525 at Ateneo Blue Babble Battalion na may iskor na 480.
