Inamin ng lead convenor ng People’s Initiative for Modernization and Reform Action (PIRMA) na nakipag-coordinate siya kay House Speaker Martin Romualdez upang makakuha umano ng 3% ng mga lagda kada congressional district para sa People’s Initiative (PI) na naglalayong isulong ang Charter Change (Cha-Cha).

Sa isinagawang pagdinig sa Senado hinggil sa signature campaign para sa PI nitong Martes, Enero 30, ipinakita ang isang larawan kung saan kasama nina PIRMA lead convenor Noel Oñate si Romualdez.

Ang naturang larawan ay kinuha umano sa gitna ng isang staff meeting para sa PI campaign noong Enero 8, 2024.

“That was the time that I sought the help of the Speaker to help us in the signature campaign,” pagkumpirma ni Oñate.

Imee, ipinagdiinang si Romualdez umano ang nasa likod ng PI campaign

“So, it’s very clear that Speaker Martin Romualdez is supporting our group po. He is all out behind the People’s Initiative, is that correct?” muling pagkuwestiyon ni Senador Imee Marcos, chairperson ng pagdinig, kay Oñate.

“Yes, we coordinated with the Speaker and the congressmen in getting the 3% per congressional district,” sagot naman ng PIRMA lead convenor.

Sa naturang hearing ay nauna nang pinatutsadahan ni Marcos si Romualdez kaugnay ng sinabi ng House leader na wala umanong pake ang Senado sa PI.

Matatandaang kamakailan lamang, iginiit din ni Marcos na si Romualdez ang nasa likod ng PI campaign.

https://balita.net.ph/2024/01/30/imee-pinatutsadahan-si-romualdez-walang-gamot-sa-kakapalan-ng-mukha-mo/

Itinanggi naman ito ni Romualdez at sinabing “walang basehan” ang akusasyon ng kaniyang pinsan.