Iniutos na ni Land Transportation Office (LTO) chief Vigor Mendoza II sa lahat ng opisyal ng ahensya na paigtingin pa ang information campaign nito sa 'No Registration, No Travel' policy ng ahensya.
Sinabi ni Mendoza na makadadagdag sa kanilang operasyon ang pagpapalaganap ng impormasyon upang mahikayat ang mga delinquent vehicle owners na magparehistro ng sasakyan.
Aniya, ang pagpaparehistro at pagre-renew ng registration ay isa sa mga pinakamabisang paraan upang suriin ang road worthiness ng mga sasakyan.
Sa datos ng LTO, nasa 24.7 milyon na ang delinquent motor vehicles sa bansa o katumbas ng 65 porsyento ng kabuuang bilang ng sasakyan sa Pilipinas.
Matatandaang sinimulan nang ipatupad ng LTO ang 'No Registration, No Travel' policy nito sa Bicol Region, MIMAROPA (Region 4B) at ang National Capital Region.
