Ang mag-asawang Derek Ramsay at Ellen Adarna daw ang tinakbuhan ng aktres na si Sarah Lahbati matapos mabugbog umano ng asawang si Richard Gutierrez.
Sa latest episode ng “Showbiz Now Na” nitong Biyernes, Disyembre 22, binalikan ni showbiz columnist Cristy Fermin ang isang blind item tungkol sa mag-asawang nagkasakitan.
Matatandaang noong nakaraang linggo, Disyembre 14, tinalakay nina Cristy ang tungkol dito at sinabing sina Richard at Sarah daw ang tinutukoy sa nasabing blind item.
MAKI-BALITA: Richard Gutierrez, Sarah Lahbati nagkakasakitan?
Ping Lacson, kinilala ambag nina PNoy, PBBM sa estado ng kaso ni Mary Jane Veloso
Samantala, ang mag-asawang tinakbuhan umano ni Sarah, matapos bugbugin ni Richard, ay sina Derek Ramsay at Ellen Adarna na nakatira umano sa village kung saan din nakatira ang dalawa.
Pero sa panayam ni Cristy kay Derek sa programang “Cristy Ferminute” kamakailan, pinabulaanan ng aktor ang tungkol dito.
“Ang sabi niya [Derek], ‘walang katotohanan. Nakakainis. Gigil na gigil ako. Mabuti na lang nandito kayo Nanay. Para ‘di na lumaki nang lumaki ito’. Kasi nadadawit ‘yung pamilya nilang mag-asawa. Walang katotohanan. Walang nagpunta doong babaeng duguan,” pagbabahagi ni Romel Chika, co-host ni Cristy.
Dagdag pa ni Cristy, kung sakali man daw na pumunta si Sarah sa bahay ni Derek, sasamahan daw umano ito ng aktor para kausapin si Richard. Hindi rin daw nakikisawsaw si Derek sa isyu ng ibang tao.
Sa kasalukuyan, habang isinusulat ang artikulong ito, wala pang anomang pahayag, tugon, o reaksiyon sina Sarah at Richard para kumpirmahin at itanggi ang tungkol dito.
