Sinentensyahan ng Sandiganbayan ang negosyante at umano’y mastermind sa pork barrel scam na si Janet Lim Napoles ng 64 taong pagkakakulong matapos itong mahatulang guilty kaugnay ng kinasangkutang ₱20.91 milyong Priority Development Assistance Fund (PDAF).

Sa inilabas na desisyon ng Sandiganbayan Special Second Division nitong Biyernes, Oktubre 20, hinatulang guilty si Napoles sa apat na bilang ng kasong graft at malversation of public funds dahil sa iligal na paggasta umano ng ₱20.91 milyong PDAF ni dating South Cotabato 2nd District representative Arthur Pingoy Jr. mula 2007 hanggang 2009.

Dahil dito, sinentensyahan umano si Napoles ng 40 taong pagkakakulong dahil sa malversation of public funds at karagdagang 24 taon para sa graft, na may kabuuang 64 taon sa bilangguan.

Kasama rin umano sa mga hinatulan ay sina National Agribusiness Corporation (NABCOR) Director for Financial Services Rhodora B. Mendoza, Bookkeeper Maria Ninez P. Guanizo, at Paralegal Victor Roman C. Cacal.

Inatasan si Napoles at mga kapwa niya akusado na magbayad ng danyos sa gobyerno at ibalik sa national treasury ang halagang ₱2,910,000, na kumakatawan sa mga pondo na mali at iligal umanong na-disburse.

Samantala, napawalang-sala umano sina Pingoy, Department of Budget and Management (DBM) Undersecretary Mario L. Relampagos; mga opisyal ng DBM na sina Rosario S. Nuñez, Lalaine N. Paule, at Marilou D. Bare; dating Technology and Livelihood Resource Center (TLRC) deputy director General Dennis L. Cunanan, group manager for Corporate Support Services Francisco B. Figura, at chief accountant Marivic V. Jover dahil sa kabiguan umano ng prosekusyon na mapatunayan ang kanilang “guilt beyond reasonable doubt.”