Idineklara na ring persona non grata ang drag queen na si Pura Luka Vega sa Oriental Mindoro kaugnay ng kaniyang kontrobersiyal na “Ama Namin” drag performance.
Sa isang email na ipinadala umano sa Philippine News Agency (PNA), inihayag ni Provincial board member Roland Ruga nitong Miyerkules, Agosto 30, na ipinasa ng 11th Sangguniang Panlalawigan (SP) ang resolusyong nagdedeklara kay Pura, may tunay na pangalang Amadeus Fernando Pagente, na persona non grata sa lalawigan.
Inihain umano ni Calapan City Councilor Rhona Leachon, nagsisilbi sa board bilang pangulo ng League of Councilors, ang naturang resolusyon sa SP noong Agosto 24.
Ayon pa kay Ruga, nakatanggap din ang provincial board ng liham mula kay Gov. Humerlito Dolor upang hilingin na ideklarang persona non grata ang drag queen dahil sa kaniyang performance na inilarawan umano ng ilan bilang “sacrilegious,” “blasphemy,” at “disrespectful.”
Tinapyasang budget ng opisina ni VP Sara, ‘di na dapat baguhin – Sen. Risa
“As public officials, it is our responsibility to promote sensible and prudent expression of art in Oriental Mindoro. We must dissuade artistic expressions offensive to social, religious, and cultural values. It is also our duty to uphold the respect and dignity accorded to religious beliefs and traditions,” ani Dolor sa kaniyang liham sa board.
Bukod naman sa Oriental Mindoro, ilang mga lungsod at lalawigan sa bansa na ang nagdeklara ng persona non grata laban kay Pura Luka Vega, kabilang na rito ang Lungsod ng Maynila, Marikina City, Marinduque, Batangas City, Bohol, Talisay, Mandaue City at Cebu City sa Cebu, Lucena City sa Quezon Province, Occidental Mindoro, Dinagat Islands, Laguna, Nueva Ecija, Cagayan de Oro City, Bukidnon, General Santos City sa South Cotabato, Floridablanca sa Pampanga, at Toboso sa Negros Occidental.
MAKI-BALITA: Mga lugar na nagdeklara ng persona non grata laban kay Pura Luka Vega
Nagbigay naman ng reaksyon kamakailan si Pura hinggil sa halos sunod-sunod na pagkaka-persona non grata sa kaniya.
“Tell me EXACTLY what I did wrong. I’m open for a dialogue and yet cities have been declaring persona non grata without even knowing me or understanding the intent of the performance. Drag is art. You judge me yet you don’t even know me,” ani Pura kamakailan.
MAKI-BALITA: Pura Luka Vega, nag-react sa halos sunod-sunod na pagka-persona non grata
Matapos nito, muling nagtanghal ang drag queen sa awitin ni Taylor Swift na “Look What You Made Me Do” at nagbigay ng pahayag hinggil sa mga isyu laban sa kaniya.
“Para sa mga ibang lugar na gustong mag-persona non grata diyan, dagdagan n’yo pa! Pakialam ko. ‘Yon lang po. Thank you po,” saad ni Pura.
MAKI-BALITA: Pura Luka Vega wafakels sa persona non grata: ‘Dagdagan n’yo pa!’
