Patuloy na umiiral ang southwest monsoon o habagat at posible itong magpaulan sa ilang bahagi ng bansa ngayong Lunes, Agosto 14, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA bandang 4:00 ng umaga, malaki ang tiyansang magkaroon ng maulap na kalangitan na may kalat-kalat na pag-ulan at thunderstorms sa Bicol Region, Visayas, Zamboanga Peninsula, Northern Mindanao, Caraga, at Palawan dulot ng habagat.
Maaari umanong magkaroon ng pagbaha o kaya nama’y pagguho ng lupa sa mga nasabing lugar dahil sa katamtaman hanggang sa malakas na pag-ulan.
Samantala, posibleng maging medyo maulap hanggang sa maulap na may kasamang isolated rainshowers o thunderstorms sa Metro Manila at mga natitirang bahagi ng bansa bunsod ng habagat o localized thunderstorms.
Matapos manalong alkalde: Kerwin Espinosa, binasa Local Government Code ng PH
Pinag-iingat din ang mga residente rito sa posible umanong pagbaha o pagguho ng lupa tuwing magkakaroon ng malalakas na thunderstorms.
Sa ngayon ay wala naman umanong mino-monitor ang PAGASA na bagyo o low pressure area sa loob at labas ng Philippine area of responsibility, kaya’t maliit umano ang tiyansang magkaroon ng bagyo sa bansa sa susunod na dalawa o tatlong araw.
