Hindi sang-ayon ang batikang aktres na si Manilyn Reynes sa kontrobersyal at pinag-usapang pahayag ng dating Kapamilya star na si Liza Soberano hinggil sa "love teams" at kung paano sisikat ang isang artista sa Pilipinas.
Natanong siya sa "Fast Talk with Boy Abunda" tungkol dito.
"Certainly kaya mong gawin 'yan (ang pagsikat o makilala) on your own… kung ano yung talent na binigay sa 'yo. Hindi mo kailangan ng isa pa," ani Manilyn.
"Hindi ko sinasabi na hindi mo kailangan ng love team. Somewhere, sometimes, somehow kailangan meron ka ring ka-love team lalo kapag growing up, mga teenager ka, ganyan. Pero of course you can do it on your own. Ipakita mo what you've got."
Pahayag ni Liza tungkol sa 'love team' sa Philippine showbiz, umani ng reaksiyon
Ang pamagat ng episode ng podcast na pinagmulan nito ay "Liza Soberano on Spending Money and Managing Stress" kung saan isa sa mga natanong sa kaniya ay ang showbiz career.
Nabanggit ni Liza ang tungkol sa kaniyang bagong sinalihang management na "Careless" na pagmamay-ari ni James Reid na actor-singer din sa Pilipinas.
Dito ay nabanggit ni Liza ang tungkol sa pagkakaroon ng "love teams" sa Philippine showbiz. Ikinuwento niya na sa Pilipinas, kung hindi ka singer, mas mapabibilis ang pagsikat ng isang artist kapag ipinareha sa isang tambalan o love team.
Inihalintulad pa niya ito kina Angelina Jolie at Brad Pitt.
"In the Philippines, the only way to become a big star really, if you're not a singer, if you're an actor, is to be in a love team," ani Liza.
Ginawa pa niyang halimbawa ang kaniyang sariling track record, na kung susuriin daw ang kaniyang mga ginawang pelikula at TV shows, mapapansing ipinareha lamang siya sa iisang co-actor (Enrique Gil).
Nagkakaroon daw ng "ilusyon" sa fans na ang mga tambalan ay "real-life couple" kaya kung ipapareha na sa iba ang mga artistang "nakahon" sa love team, magngingitngit ang kalooban ng kanilang die-hard supporters.
Nagulat naman sina Ashley at Peniel sa kalakaran ng showbiz industry sa Pilipinas.
Sey naman ni Liza, matagal na raw itong kalakaran sa showbiz noon pang 70s o 80s.
Sa kabilang banda, hindi naman daw hinuhusgahan ni Liza ang ilang love teams na nauwi sa totohanan ang kanilang relasyon. Marami raw sa kanila ang talagang naging masaya sa kanilang pagsasama.
