Isiniwalat ng Joint Task Force Negros (JTFN) na nasamsam ng mga operatiba ng pamahalaan sa isang sugar mill compound na umano’y pag-aari ni dating Negros Oriental Gov. Pryde Henry Teves ang personal na mga gamit ng mga suspek sa pagpaslang kay Negros Oriental Gov. Roel Degamo.
Sa ulat ng Philippine News Agency, natagpuan umano nitong Huwebes, Marso 30, sa pamamagitan ng backhoe sa HDJ-Bayawan Agri-Venture Corp. Tolong sa Barangay Caranoche, Santa Catalina, Negros Oriental, ang mga nasunog na damit, identification cards, Automated Teller Machine cards, at sari-saring mga dokumento ng nakilalang mga suspek.
Nakita rin umano ang isang silencer, isang soldering iron, rifle cleaning paraphernalia, mga empty slug ng .45 caliber, isang Swiss knife, at isang tacker na ginagamit para sa target papers.
Ang nasabing pagkasamsam ng mga gamit ay bahagi ng patuloy na operasyon ng Philippine National Police-Criminal Investigation and Detection Group (CIDG) sa tulong ng JTFN na bunubuo ng mga sundalo at pulisya.
Nancy Binay, nilinaw na 'di kaaway ang kapatid na si Abby: 'Pamilya pa rin kami!'
Noong Marso 24 lamang ay 10 baril at mga bala umano ang nasamsam din sa isang sugar mill na pag-aari umano ni dating Gov. Teves.
BASAHIN: Pag-aari ni ex-Gov. Teves? 10 baril, mga bala nasamsam sa ni-raid na sugar mill sa Negros Oriental
Sinabi naman ni ex-Gov. Teves na bagama’t siya ang presidente ng kompanya, 10% lang umano ang pag-aari niya rito at mayroon umano itong limang ibang incorporators.
Samantala, boluntaryo umanong isinuko ng nasabing dating gobernador ang ilang mga baril at bala sa pulisya noong Huwebes, isang araw matapos siyang maghain ng waiver sa Hall of Justice sa Dumaguete City na nagpapahintulot sa mga awtoridad na hanapin ang kaniyang telepono at mga bank account.
Si ex-Gov. Teves ay nakababatang kapatid ni Negros Oriental Rep. Arnolfo Teves Jr. na tinitingnan ng Department of Justice bilang isa sa mga mastermind sa pag-ambush kay Degamo.
BASAHIN: Teves, isa sa mga tinitingnang mastermind sa pagpaslang kay Degamo – Sec Remulla
Matatandaang nasawi si Degamo at walo pang sibilyan na nadamay matapos siyang pagbabarilin ng mga armadong indibidwal sa harap ng bahay nito habang siya ay nakikipag-usap sa ilang mga benepisyaryo ng 4Ps.
