Naniniwala si Surigao del Sur 2nd district Rep. Johnny Pimentel na babahain ang may-ari ng lumubog na MT Princess Empress ng compensation claims mula sa libo-libong mga naapektuhan ng kumakalat na oil spill sa mga baybay-dagat ng bansa.
Sa pahayag ni Pimentel nitong Linggo, Marso 19, ibinahagi niyang dapat lamang ding mapanagot ang RDC Reield Marine Services Inc. na siyang mag-ari ng nasabing lumubog tanker na may kargang 800,000 litrong industrial fuel.
“We expect the oil tanker’s owner to be swamped with compensation claims from individuals and entities harmed by the spill, including those forced to conduct their own cleanup activities,” ani Pimentel.
Binanggit din ng mambabatas ang Republic Act No. 9483 o ang Oil Pollution Compensation Law of 2007 at sinabing responsable ang may-ari ng MT Princess Empress sa pinsalang polusyon ng nasabing oil spill.
Nancy Binay, nilinaw na 'di kaaway ang kapatid na si Abby: 'Pamilya pa rin kami!'
Dahil dito, nararapat na maging responsable umano ang RDC sa gastos na natamo sa paglilinis ng mga baybay-dagat na nakontamina ng oil spill, pagkawala ng kita at pinsala sa kalusugan ng mga residente rito, at pinsala sa kapaligiran ng bansa na siyang naapektuhan ng oil spill.
Ayon sa National Disaster Risk Reduction and Management Council (NDRRMC), mahigit 10 munispalidad sa mga probinsya ng Oriental Mindoro at Antique na ang nasailalim sa state of calamity dahil sa nasabing oil spill.
Sa prediksyon ng University of the Philippines Marine Science Institute, maaari pang pasukin ng mahigit pang oil spill ang baybay-dagat ng Calapan City, Oriental Mindoro.
BASAHIN: Calapan, maaaring pasukin pa ng mahigit pang oil spill – UP expert
Matatandaang naiulat na lumubog ang MT Princess Empress noong Pebrero 28 sa Naujan, Oriental Mindoro dahil umano sa lakas ng alon.
