Makararanas pa rin ng pag-ulan ang malaking bahagi ng bansa ngayong Linggo, Pebrero 19, dulot ng low pressure area (LPA) at northeast monsoon o amihan, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA, namataan kaninang 3:00 ng madaling araw ang LPA sa layong 195 kilometro sa hilagang-silangan ng Surigao City, Surigao del Norte o 160 kilometro sa silangan ng Tacloban City, Leyte.
“The probability of this weather disturbance to develop into tropical depression remains less likely,” anang PAGASA.
Makararanas ng maulap na may kalat-kalat na pag-ulan at thunderstorms sa Visayas, Caraga, Northern Mindanao, Bicol Region, Quezon, Romblon, at Marinduque bunsod ng LPA.
PUP nagbukas na rin ng klase para sa female PDLs ng Manila City Jail
Magkakaroon din ng maulap na may pag-ulan sa Cagayan Valley, Cordillera Administrative Region, at Aurora dahil naman sa amihan.
Ayon sa PAGASA, maaaring makaranas ng pagbaha o kaya naman ay pagguho ng lupa sa mga nasabing lugar dahil sa katamtaman hanggang sa malakas na pag-ulan.
Makarararanas naman ng medyo maulap hanggang sa maulap na may kasamang katamtamang pag-ulan sa Metro Manila at mga natitirang bahagi ng Luzon dulot ng amihan. Wala namang inaasahang malaking epekto ang pag-ulan dito.
Samantala, magkakaroon ng medyo maulap hanggang sa maulap na may panaka-nakang pag-ulan o thunderstorms sa mga natitirang bahagi ng Mindanao at natitirang bahagi ng MIMAROPA dahil sa localized thunderstorms. Posible rin ang pagbaha o kaya naman ay pagguho ng lupa sa mga lugar dito tuwing magkakaroon ng malakas na thunderstorms.
