Patuloy na uulanin ang malaking bahagi ng bansa ngayong Huwebes, Pebrero 16, bunsod ng trough ng low pressure area (LPA) at northeast monsoon o amihan, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA kaninang 4:00 ng madaling araw, namataan ang LPA sa layong 750 kilometro sa silangan ng Hinatuan, Surigao del Sur.
Kaya naman, magiging maulap na may kalat-kalat na pag-ulan at thunderstorms sa Caraga, Davao Region, Northern Mindanao, and Zamboanga Peninsula bunsod ng trough ng LPA.
Magkakaroon din ng maulap na may pag-ulan sa Cagayan Valley, Cordillera Administrative Region, Aurora, Quezon, Oriental Mindoro, at Bicol Region dahil naman sa amihan.
PUP nagbukas na rin ng klase para sa female PDLs ng Manila City Jail
Ayon sa PAGASA, maaaring makaranas ng pagbaha o kaya naman ay pagguho ng lupa ang mga nasabing lugar dahil sa katamtaman hanggang sa malakas na pag-ulan.
Samantala, magiging medyo maulap hanggang sa maulap na may kasamang katamtamang pag-ulan sa Metro Manila at mga natitirang bahagi ng Luzon dulot ng amihan. Wala namang inaasahang malaking epekto ang pag-ulan dito.
Makarararanas naman ng medyo maulap hanggang sa maulap na may panaka-nakang pag-ulan o thunderstorms sa mga natitirang bahagi ng Mindanao dahil sa trough ng LPA o kaya naman ay dahil sa localized thunderstorms. Pinag-iingat din ng PAGASA ang mga residente rito dahil sa posibleng pagbaha o kaya naman ay pagguho ng lupa tuwing magkakaroon ng malakas na thunderstorms.
