Kinabiliban ng netizens ang diorama ni Nhoda Muñoz, 28, mula sa Mabalacat City, Pampanga, tampok ang maliit na version ng tahanan. Ang malikhaing hilig, nagsisilbi niyang pahinga.
Sa panayam ng Balita Online, ibinahagi ni Muñoz na inspirasyon daw ng nasabing obra niya ang mga bahay na nakikita at hinahangaan niya noong nakatira pa sila sa tabi ng riles ng tren sa Mabalacat, Pampanga.
“Yung bahay namin, mas maliit sa ginagawa ko, kasi ang mga ginagawang kong version ng diorama ay ang mga bahay na nakikita ko noon na mas maganda sa bahay na kinalakihan ko,” kuwento niya.
Mula sa pagiging full time tattoo artist, nagsimula raw tahakin ni Muñoz ang mundo ng diorama para maipahinga at mapabuti ang kaniyang mental health noong dumating ang pandemic.
ManilART 2024: Alamin ang iba’t ibang sining na tampok dito
“Ito po ‘yung tinuring kong brain therapy para labanan ang depression ko. Kasi during the lockdown po, tinamaan ako ng matinding depression,” saad niya.
Madalas inaabot daw si Muñoz ng dalawang buwan bago matapos ang isang diorama. Ngunit hindi niya ito alintana. Sa tuwing gumagawa nito, nakapagpapahinga siya at gumagaan ang kaniyang pakiramdam.
Hindi naman daw inaasahan ni Muñoz na marami ang bibilib at magkaka-interes sa mga diorama niya. May mga nagsimulang mag-order at magpagawa raw sa kaniya nito hanggang sa ito na ang naging source of income niya ngayon.
“Blessed ang thankful po ako. Nagpapasalamat po ako sa Panginoon kasi binigyan Niya ako ng ganitong klaseng gawain. Kumbaga para sa akin, ito talaga ‘yung plano niya sakin during the pandemic,” ani Muñoz.
Nagpapasalamat din daw siya sa mga taong patuloy na sumusuporta sa kaniya at kaniyang mga obra. Sinisigurado rin niyang pagbubutihan pa ang paggawa ng mga diorama sa hinaharap.
Sa ngayon ay umabot na sa mahigit 5,800 reactions, 100 comments, at 110 shares ang post ni Muñoz tungkol sa nasabing diorama.
–
Nais mo bang mai-feature ang iyong storya o ‘di kaya mayroon kang larawan at video na gusto mong i-share? I-message mo lang kami sa amingFacebookatTwitter!
