Masasabing naging matagumpay ang "I Am Toni" concert ni Ultimate Multimedia Star Toni Gonzaga-Soriano na ginanap kahapon ng Biyernes ng gabi, Enero 20, sa Smart Araneta Coliseum.

Ang concert na ito ay pagdiriwang ni Toni para sa 20th anniversary sa industriya.

Kinanta ni Toni ang kaniyang mga naging hit songs, at siyempre, pati na ang mga inawit niya sa panahon ng kampanya gaya ng "Roar" at "Titanium". Hindi rin siya nangiming banggitin ang "Sabay-sabay!" na sumikat na pang-asar sa kaniya, dahil hindi niya raw naabot ang nota sa nabanggit na huling awiting nabanggit.

Siyempre, hindi rin mawawala sa kaniyang concert ang kapatid na si Alex Gonzaga, na ilang araw nang trending dahil sa isyu ng pamamahid ng icing ng cake sa noo ng isang server, sa birthday party para sa kaniya.

Pagso-sorry ni Alex Gonzaga, umani ng iba't ibang komento mula sa netizens

Isang Twitter user na nagngangalang "Fiffany Fink" ang nagbahagi ng video clip kung saan pinagkatuwaan ng magkapatid ang isyu. Ani Alex, iniiwasan na raw niya ngayon ang mga cake at mukhang ban muna ito kapag may birthday.

Maririnig naman ang hiyawan, halakhakan, at palakpakan ng audience.

Matatandaang nag-sorry na sa server at publiko si Alex subalit ayaw pa rin siyang tantanan ng bashers at detractors.