Kasunod ng trending na promo at fan meeting event ng South Korean group na ENHYPEN sa Pilipinas kamakailan, dito nagulantang ang marami kung gaano katangkad si Kapamilya singer-actor Darren Espanto.
Ang 21-anyos na young star ang isa sa opening act ng inabangan at sold-out na BYS press conference at fun meet ng ENHYPEN sa Araneta Coliseum noong Dis. 3.
As expected, isang interaksyon ng Kapamilya star at rising K-pop group ang natunghayan ng fans na ibinahagi pa ni Darren sa kaniyang Instagram kamakailan.
ALAMIN: Mga dapat mong malaman tungkol kay Jose Rizal
Kasunod nito, isang maikling clip naman ang agad na nag-viral online matapos mapansin ng maraming netizens ang angat na angat na tangkad ni Darren.
Kilalang matatayog ang ilang K-pop idols at Korean stars kaya’t hindi inasahan ng marami ang larawan ng ENHYPEN kung saan makikitang si Darren nga ang literal na nangibabaw.
Sa isa pang viral na TikTok video, nahuli pang tila nagtaka at pasimpleng tiningnan ng ilang miyembro ng ENHYPEN ang suot na sapatos ng Kapamilya star.
Umani ang naturang video ng nasa mahigit tatlong milyong views sa pag-uulat.
Sari-saring reaksyon kabilang na nga ang tanong kung gaano nga ba katangkad ang Pinoy singer ang agad na naging usap-usapan.
Sa katunayan, isang netizen pa ang nakapansin na trending maging sa Google search ang naturang tanong.
Sa kaniyang Twitter noong Linggo, Nob. 5, sinagot na mismo ni Darren ang trending question.
“To those who are wondering, I’m six feet tall,” aniya.
Teyorya naman ng ilang ENHYPEN fans, nakadagdag din anila sa tangkad ng Kapamilya star sa suot nitong footwear, dahilan para tila malayo ang naging agwat nito sa mga miyembro ng grupo.
Samantala, binubuo nina Ni-Ki, Jay, Jake, Juungwon, Heesung, Sunghoon at Sunoo ang ENHYPEN.
Ang HYBE rising global group ang nasa likod ng mga kantang “Fever,” “Tamed-Dashed,” “Blessed-Cursed” bukod sa iba pa.
