Ibinahagi ng komedyanteng si Tuesday Vargas ang naging engkuwentro niya sa mga "batang artista" na nagkataong nakasama niya sa isang event.
Sunod-sunod ang naging social media posts ni Vargas noong Disyembre 2 patungkol sa "mga batang artistang" nakisingit na nga raw sa program flow, hindi man lamang siya pinansin. Ang mas nakakaloka pa rito, hinarangan pa raw siya ng handler ng mga ito dahil sa pag-aakalang magpapakuha siya ng litrato sa kanila.
Talak ng komedyante na isa sa mga mainstay sa "Bubble Gang", “Mga batang artista, kahit gaano kayo ka-sikat at pinagkakaguluhan ng mga tao, mag-hello kayo sa kapwa n'yo artista pagdating sa work. Lalo na sa nakakatanda."
“Sumingit na nga kayo sa program kasi nagagalit na ang handler nyo at bawal ata kayong pinaghihintay."
#WalangPasok: Class suspensions ngayong Biyernes, Sept. 20
“Tapos ako pa ang nagbigay galang sa inyo, dinedma nyo pa ako."
"Tandaan, madaling maabot ang fame. Longevity is harder.
“Pakabait ok? Huwag ganun.”
Napakomento naman dito ang kilalang direktor na si Louie Ignacio.
“Jusko madaling malalaos yang mga batang yan sa ugali nila.
“Feeling sikat agad ha nakakaloka!!!!”
Nagkuwento pa si Tuesday na siya pa mismo ang lumapit sa kanila at nagtangkang makipag-handshake subalit dedma raw sila. Hinarangan pa raw siya ng handler nito sa pag-aakalang magpapa-selfie siya.
Sa sumunod na post ni Tuesday ay napag-alaman niya ang maaaring dahilan kung bakit nagmamadali at sumingit sa program flow ang nabanggit na mga batang artista. Dito ay tinukoy niyang "dalawa" sila.
“Ayun! Kaya pala nagmamadali ang dalawa at sumingit sa program kasi um-attend pa sila ng isang event pa ng sponsor nila."
“Paid gig ito mga anak. Sana di nyo kinuha kung mag-a-attitude lang at magmamadali."
“Mahalin ang trabaho. Para mas madami pa kayong proyekto."
“Nakita ko pa talaga sa feed ko eh. Nahuli ko tuloy.”
Lumipas ang ilang sandali ay agad ding binura ng komedyante ang kaniyang parinig posts at pinalitan ito ng iba.
“Decided to delete my posts and will just leave this here instead because I am beautiful. Ganoin," caption niya, kalakip ang isang art card na may quotation na “Beautiful things don’t ask for attention.”
Sa latest FB post ni Tuesday, sinabi niyang maraming nag-aabang sa kaniyang pa-reveal kung sino nga ba ang mga "batang artista" na tinutukoy niya.
"Ang daming nakaabang sa pagpatol ko. Mga anak tulog na. Wala na pong oras si Tita Tuesday kasi lagari ako today. Ganun talaga pag laos," ani Tuesday.
