Wala mang binitawang petsa, ngunit siniguro ng artistang si Kaye Abad na magbabalik siya sa larangan ng showbiz matapos ang hiatus.
Sa katatapos lamang na Star Magical Christmas gathering ng talent agency na Star Magic, muling pinatunayan ni Abad ang kanyang katapatan sa Star Magic, ang kanyang talent agency na mahigit 26 na taon, matapos siyang parangalan ng isang loyalty award.
Nagpahayag siya ng pasasalamat sa kanyang talent agency, mga handler at manager sa nakalipas na dalawang dekada, gayundin ang mga executive ng ABS-CBN.
Sa kanyang talumpati, ibinahagi ni Abad na ni minsan ay hindi niya naisip na umalis sa Star Magic para lumipat sa ibang ahensya.
50.78% examinees, pasado sa Nov. 2024 Licensure Exam for Agriculturists
“Thank you to my Star Magic family for this recognition. Hindi ko na siguro kailangan pang patunayan sa inyo kung gaano ko kayo kamahal, because never pumasok sa isip ko na iwanan kayo,” ani Abad.
Tapatan niya ring sinabi na sumagi na sa kanyang isip na magretiro upang pagtuunan pa ng pansin ang kanyang pamilya ngunit sa halip ay nauwi ito sa hiatus lamang.
“Though may isang instance — Lolo, remember, noong nagpaalam ako sa ‘yo bago ako ikasal, titigil na ako? — but then, nandito pa rin ako,” masayang mensahe ni Abad.
Ang tinutukoy ng aktres ay ang Star Magic head na si Laurenti Dyogi na nangalaga sa kanya.
Sa kanyang mensahe kay Dyogi, inalala rin ni Abad na kabilang siya sa mga unang naniwala sa kanyang talento bilang aktres.
Aniya, “To Lolo LMD, thank you. Isa ka sa mga tao na kahit before, before pa ako mag-‘Tabing Ilog,’ isa ka sa mga taong naniwala sa kakayanan ko."
Umaasa naman si Abad na makakabalik agad sa larangan ng showbiz: “I hope to be back soon, kung hindi ako mabuntis ulit! Joke lang, ayoko na!”
