Laugh trip at kilig ang dulot sa mga netizen ng Facebook post ng jowa ni Daisy Lopez a.k.a. "Madam Inutz" na si "Edward 'Chinito' Tan" o tinatawag ding "Tantan", matapos nitong ipakita ang edited photo ng jowa na kasa-kasama sa isang formal event, na mahihinuhang sa isang hotel.
"Lagi akong gagawa ng paraan para makasama ka, kahit malayo ka sa tabi ko Madam Inutz," sey sa caption ng kaniyang jowa.
Okay na sana, subalit mapapansing walang mga binti ang edited photo ni Madam Inutz.
"hayuppp ka nawalan pako ng binti Jan uwi na dito," reaksiyon ni Madam Inutz.
#WalangPasok: Class suspensions ngayong Biyernes, Sept. 20
Reaksiyon pa ni Madam Inutz, "YUNG PAGKA-SWEET MO WALA SA LUGAR ‼️😆 GINAWA MO PA 'KONG MANANANGGAL DITO."
Matatandaang noong Hunyo, ibinalandra ng sikat na online seller, Pinoy Big Brother: Kumunity Season 10 celebrity housemate, at ngayon ay Kapamilya comedian, na finally ay may nagpapatibok na sa kaniyang… puso.
Sa kaniyang vlog na inupload noong Hunyo 18, pormal nang ipinakilala ni Madam Inutz ang kaniyang jowang si Tantan na nagtatrabaho bilang entertainer sa "One Club 690" na pagmamay-ari ng kaniyang talent manager na si Wilbert Tolentino. Doon umano sila nagkakilala ni Tantan.
Paglilinaw ng Mamabentang online seller, kahit sa bar naghahanapbuhay si Tantan ay hindi siya pineperahan nito, gaya ng sinasabi ng mga netizen tungkol dito.
"Mas mapera pa siya sa akin… mas malakas pang kumita sa akin 'to, mga inutil," ani Madam.
Isa pang nilinaw nila ay ang isyung beki umano ito, dahil nga sa isang bar ito nagtatrabaho.
"Bakla ka ba?" tanong ni Madam.
"Hindi tayo sure," biro nito. "Siyempre hindi!"
"Hindi ako bayot, hindi ako bading, hindi ako paminta. Lalaki ako, straight. 100 percent. Hindi ko kailangang patunayan sa inyo kung ano ako, 'di ba? Kung ano naman sabihin ng iba, wala naman akong magagawa doon eh."
Hindi rin umano ginagamit ni Tantan si Madam Inutz upang sumikat at makapasok sa showbiz.
Isiniwalat din ni Madam Inutz na pareho silang single parent ng jowa.
Umapela naman ang madam sa publiko na huwag sanang husgahan ang kaniyang kasintahan, bagama't nauunawaan naman niyang concern lang ang mga tagahanga niya sa kaniya. Open book naman kasi sa lahat na hindi naging matagumpay ang mga naging relasyon niya sa mga tatay ng kaniyang anak.
"Hindi naman makatao ang sinasabi ni iba. Alam kong concern kayo [sa akin], pero mas maganda siguro kung kilalanin muna natin si Tantan."
"Maganda siguro kung ititigil natin 'yong panghuhusga sa kapwa, lalo na kung hindi mo pa naman nakakausap o kilala 'yong taong hinuhusgahan mo. Iyan ang pangit sa ating mga Pilipino, parang kilalang-kilala mo na 'yong tao para manghusga," aniya pa.
Basahin: https://balita.net.ph/2022/06/19/lalaking-nagpatibok-ng-ano-ko-puso-jowa-ni-madam-inutz-iniisyung-namemera-at-paminta/">https://balita.net.ph/2022/06/19/lalaking-nagpatibok-ng-ano-ko-puso-jowa-ni-madam-inutz-iniisyung-namemera-at-paminta/
