Matapos ang mahigit dalawang buwang paghahanap, ipinakilala na ng bandang “LILY,” dating “Callalily” bago kumalas si Kean Cipriano, ang pinakabago nitong bokalista.
Noong Martes, ipinakilala na bilang opisyal na bokalista ng grupo si Joshua Camacho Bulot matapos ang naganap na grand finals ng “Search For The New Lily Vox” sa isang mall sa Antipolo noong Linggo, Setyembre 18.
ALAMIN: Mga dapat malaman at gawin upang maging ligtas sa ‘tsunami’
Matatandaan noong Hulyo pa binuksan ng grupo ang audition kasunod ng kumpirmasyon ng “disengagement” ng dating bokalista ng grupo na si Kean bitbit ang pangalang “Callalily” dahilan para mabago rin ang pangalan ng banda.
Kasama nina Bryan del Rosario at Kim Lawrenz Ordonio, si Joshua ay dating miyembro ng OPM Trio na “JBK” na nakilala sa kanilang stint sa “X-Factor UK” noong 2017.
Noong 2019, napabilang din ang singer-actor sa award-winning hit Pinoy musical na “Rak of Aegis.”
Sa panibagong oportunidad, excited si Joshua para sa bagong music journey.
“Sana mameet ko lahat ng Callalily fans, cause I'm a fan too. 'Di ko kayo bibiguin,” anang bokalista.
Noong Lunes, Setyembre 19, unang beses na nag-perform ang LILY kasama si Joshua.
Maraming fans naman ang nagpahiwatig ng positibong pag-usad pa rin ng grupo matapos ang mga nakaraang kontrobersiya.
