Handa umanong ipagtanggol ni Manay Lolit Solis hanggang nabubuhay siya ang actor-politician na si Senador Ramon "Bong" Revilla, Jr., matapos nitong bayaran ang kaniyang hospital bills dulot ng kaniyang pagkakasakit nitong Hulyo.
Isinugod sa ospital si Lolit ng kaniyang kasama sa bahay dahil hindi umano siya makahinga nang maayos, madaling-araw ng Linggo, Hulyo 17. Nagbiro pa ang showbiz columnist na baka kinukulam o sinumpa raw siya ng Kapuso star na si Bea Alonzo.
Basahin: https://balita.net.ph/2022/07/24/lolit-nagpapagaling-na-raw-mula-sa-sumpa-ni-bea-nagpasalamat-sa-support-group-ilang-celebrities/">https://balita.net.ph/2022/07/24/lolit-nagpapagaling-na-raw-mula-sa-sumpa-ni-bea-nagpasalamat-sa-support-group-ilang-celebrities/
"Talagang I will take a bullet for Bong Revilla Salve at Gorgy. Nakita ko sa kaniya iyong sincere na concern sa kalagayan ko," ani Manay Lolit sa kaniyang latest Instagram post nitong Martes, Agosto 2.
Napag-alaman daw ng showbiz columnist na wala na siyang babayaran, dahil binayaran na nga raw ng senador na lagi rin niyang ipinagtatanggol at pinupuri sa kabila ng mga kinasangkutang kontrobersya.
Nalaman pa niyang kinausap daw ng senador ang pamunuan ng ospital at sinabihang ibigay ang lahat ng kaniyang mga kailangan, at ito na raw ang bahala sa mga gastusin.
"Iyon talagang kung meron lang siyang magagawa para gumaling ako gagawin niya talaga. Naloka ako ng babayaran ko na ang hospital bill ko at malaman bayad na lahat. Iyon pala kinausap niya ang hospital to give me all I need at bahala siya sa gastos."
"Hindi iyong pagbabayad niya ng hospital bills ko ang naka-touched sa akin, iyong pagsasabi niya na don't leave anything out to give me kung ano ang dapat para gumaling ako. Iyon lagi niyang pagtatanong kay Gorgy kung ano na ang lagay ko."
"I will really take a bullet for Bong Revilla anytime, dahil alam ko na hindi sayang ang pagmamahal ko sa kaniya, na anuman ang ibigay ko, kaya niyang tapatan din at totoo na love begets love."
"Marunong siyang magmahal, kaya dapat din siyang mahalin. I love you Bong, thank you," pasasalamat ni Lolit.
Bukod kay Revilla, pinasalamatan din ng showbiz columnist ang mga celebrity na talagang nangungumusta sa kaniyang kalagayan, kagaya nina Vic Sotto at Pauleen Luna.
