Game 7 sa WC playoff, naipuwersa ng San Antonio Spurs
SAN ANTONIO (AP) — Tangan ang malawak na karanasan sa krusyal na sandali at sistema ng playoff series, nagawang maipuwersa ng San Antonio Spurts ang playoff match kontra Denver Nuggets sa ‘sudden death’ Game 7.
Hataw si LaMarcus Aldridge sa naiskor na 26 puntos, habang kumana si DeMar DeRozan ng 25 puntos para ibasura ang matikas na 43 puntos ni Nikola Jokic tungo sa 120-103 panalo sa Game 6 ng kanilang best-of-seven playoff nitong Huwebes (Biyernes sa Manila).
Naitala ni Jokic ang 27 puntos sa second half para sa ikatlong pinakamataas na puntos na nagawa sa isang period sa postseason sa likod nina Portland’s Damian Lillard (50) at Golden State’s Kevin Durant (45). Kumabig din si Jokic ng 12 rebounds at siyam na assists.
Akari Sports wala pang balak pasukin ang PBA
Gaganapin ang Game 7 sa Sabado (Linggo sa Manila) sa Denver, kung saan tangan ng Nuggets ang league’s best home record sa regular season. Ang magwawagi ay uusad sa second round laban sa Portland.
Nag-ambag si Jamal Murray ng 16 puntos at kumana si Gary Harris ng 14 puntos sa Nuggets.
Nalagay sa alanganin ang San Antonio nang gapiin ng Denver, 108-90, nitong Martes sa Game 5 kung saan umabot sa 30 puntos ang abante ng Nuggets.
Nagtulong sina DeRozan at Aldridge para maitarak ang 34-24 bentahe sa first quarter.
Nag-ambag si Rudy Gay ng 19 puntos at umiskor si Marco Belinelli ng siyam.
