Ni REGGEE BONOAN

NAGKATAWANAN ang entertainment press sa sagot ni Daniel Padilla nang tanungin kung ano ang ginagawa niya sa pelikulang Gandarrapiddo The Revenger Squad na pinagbibidahan nila nina Vice Ganda at 2015 Miss Universe na si Pia Wurtzbach na parehong idolo ng mga bading.

“Pangbalanse lang para hindi baklang-bakla, balance lang,” sabay bawing, “pero masaya, masaya sa set namin.”

Maraming collection ng superheroes si Daniel at ang latest niyang paborito ay, “Gusto ko Guardians of the Galaxy.

Yes, gusto ko ring gumanap na superhero eversince bata ako, gusto kong gumanap.”

Sa pelikula, si Daniel pala si Rappiddo.

“Mabilis gumalaw si Rappiddo sa lahat ng bagay,” say ng binata.

Samantala, natanong siya kung ano ang plano nila ni Kathryn Bernardo sa Pasko.

“Normal lang, sa bahay, pamilya. Pupunta ako sa bahay nila, baka dumaan din siya sa amin to celebrate with the family and friends, okay na ‘yun, masaya na kami nu’n.”

Naibahagi naman ng direktor ng The Revenger Squad na si Bb. Joyce Bernal na parang sina Dolphy at Panchito raw sina Vice at Daniel na maganda rapport, isama pa si Pia na parang si Chichay naman daw.

“Alam nila kung ano ‘yung gagawin nila, may rapport sila na nakakatawa, nanonood na nga lang kami ni Pia, eh. Siguro isang pelikula pa, kaya na ring sumabay ni Pia kina Vice at Daniel at siya Chichay, ha-ha, kasi kaya niya to make fun of herself kahit na Miss Universe siya, hindi siya umarteng ‘respetuhin ako!’ ganu’n.

“Alam niyang comedy at lahat ng ‘pinagawa namin sa kanya ay ginawa niya po lahat,” kuwento ni Direk Joyce.

Pero kapag seryoso na at off-camera ay seryosong nag-uusap sina Vice at Daniel.

“Marami kaming personal na usapan about life and business, mas ganu’n ang mga nilo-look forward ko sa kanya (Vice),” sabi ni Daniel.

Kasama ang iba pang mga kaibigan sa showbiz at sports, magkasosyo sina Vice at DJ sa District 8 Resto-Pub sa Greenhills, San Juan City.

Nabanggit din ng Teen King na riot sa set ng Gandarrappido The Revenger Squad dahil kasama rin ang kanyang Mommy Karla Estrada na matagal nang kaibigan ni Vice.

“Masaya ako na nakikita ko ‘yung ermat ko na kasama ko sa trabaho, siyempre saka riot talaga sila sa set. Sabay ko kasing sinu-shoot itong The Revenger at La Luna (Sangre) at alam naman natin na sobrang nakakapagod talaga ang La Luna kasi araw-araw kami kaya kapag lumilipat ako ng Revenger nare-refresh ako kasi nandoon naman ang ermat ko, nandoon si Vice, kaya talagang tawanan kami sa set so masaya,” kuwento ni Daniel.

Inamin din ng aktor na may cameo role si Kathryn Bernardo sa The Revenger Squad at wala siyang love interest sa pelikula.

“Isasama ko na lang siya sa premiere night,” aniya.

Showing na ang Gandarrapiddo The Revenger Squad sa Disyembre 25 mula sa Star Cinema at Viva Films.