MAMAYANG gabi na mapapanood ang grand wedding nina Benjie Rosales (Alden Richards) at Sinag Obispo (Maine Mendoza) sa finale episode ng teleserye nilang Destined To Be Yours (DTBY) pagkatapos ng Mulawin vs Ravena sa GMA-7.
Ipinakita sa “Chika Minute” last Wednesday, ang sneak preview ng preparation sa wedding ceremony at nakakuha rin kami ng ilang informations sa mga nasa location nang araw na iyon. Kinunan ang wedding scene sa Aviary sa Dolores, Quezon, na tinawag nilang Pelangi sa istorya. Sinunod ng production at ni Direk Irene Villamor ang request ni Maine na nagmistulang wedding coordinator mula sa pagsi-set up ng event hanggang sa wedding proper.
English garden and ruins ang concept ng wedding at libu-libong Equadorian roses, orchids, in pastel colors ang ginamit na decors, na nag-reflect sa masayahing personality ni Maine. Ang wedding bouquet ni Maine ay made of tulips.
Dating ALS learner, isa nang ganap na police officer
Pero dahil kasalan nga, dominant pa rin ang white. Si Maine ang namili ng wedding march nila na sabi niya: “Ewan ko, dalang-dala ako ng lyrics ng kanta, makabagbag-damdamin, hindi ko maitindihan kung ano ang nararamdaman ko.”
Inamin naman ni Alden na may kilig scenes pa rin sila.
“Dito kasi namin nai-enjoy ni Maine ‘yung mga ginagawa namin off-cam na nadadala namin on-screen,” sabi ng binata.
Si Maine din ang namili ng wedding gown niya kay Jazel Sy at ng suit na isusuot ni Alden. Last Sunday, May 21, after their segment sa Sunday Pinasaya, kasama ang executive producer nila ng soap, umalis agad si Maine para mag-fitting ng kanyang wedding gown.
Kaya pagkatapos ng maraming hirap na pinagdaanan nina Benjie at Sinag, na ikinainis ng marami sa AlDub Nation dahil feeling nila ay kulang ang exposure ng mga bida na magkasama, ngayon sa pagtatapos ng serye ay todo ang bigay sa kanila ng GMA.
Pero may mga gustong ma-resolve ang AlDub Nation sa mga nakaraang episode, ito ay kung malalaman pa na sinabotahe ni Catalina (Ina Feleo), auntie ni Benjie, ang project ng binata kaya muntik na itong mapalayas ng Lolo Vicente (Tommy Abuel). Gusto rin nilang ma-resolve kung malalaman ba na nagtaksil si Trish (Thea Tolentino) kay Benjie nang makipagbalikan ito sa dating boyfriend. Mabuti na lamang daw at na-realize din ni Benjie na si Sinag talaga ang mahal niya at walang nagawa si Trish kahit isiksik pa rin niya ang sarili kay Benjie.
Pero may isa pang dapat abangan mamaya ang AlDub Nation at netizens na sumubaybay ng tatlong buwan sa DTBY, huwag daw palampasin ang pagbabasa ng wedding vows nina Benjie at Sinag na mismong sina Alden at Maine ang sumulat.
Mas maganda raw ito kaysa wedding vows na isinulat din nila nang ikasal sila sa kalyeserye ng Eat Bulaga noong October 22, 2016.
So, para kina Benjie at Sinag mula sa ADN, mabuhay ang bagong kasal! (NORA CALDERON)
