MATAGAL na naming tinutukso ang napakahusay na program manager ng GMA Network na si Hazel Abonita na mas bagay sa Primetime Telebabad ang mga teleseryeng ginagawa niya.
Si Hazel kasi ang nasa likod ng drama series sa mga panghapong slot ng GMA-7 na nagpapahirap sa mga tumatapat na programa ng ABS-CBN tulad ng My Lady Boss, Ikaw Lang Ang Mamahalin, Tween Academy at napakakaraming iba pa.
Kaya tuwang-tuwa kami nang dalhin sa primetime ang kanyang Little Nanay na pinagbibidahan ni Kris Bernal. At mukhang magtutuluy-tuloy na ang mga show niya sa primetime dahil ang ipapalit sa timeslot ng Little Nanay ay ang Juan Happy Love Story na si Hazel uli ang namamahala.
'Iconic women!' Pinakamalaki at pinakamaliit na babae sa buong mundo, nagkita!
Excited ang buong GMA Network sa bagong naughty project na ito dahil pinagsama ang hot na hot na sina Heart Evangelista at Dennis Trillo.
Dream boy ang role ni Dennis Trillo bilang Juan, matinik sa chicks at sa negosyo, responsible kaya mula sa pagiging car salesman ay naging used car shop owner. Mahusay siya sa planning kaya walang palpak sa mga diskarte niya.
Si Heart Evangelista ang katapat niya bilang Happy, nangangarap na makilala na ang kanyang dream boy. Nagka-boyfriend na pero walang naging seryoso. Palaban sa buhay, loyal at family-oriented si Happy. Kabaligtaran ni Juan, hindi pa mapatino ni Happy ang kanyang buhay.
Ang kombinasyon na ito ang bagong formula ni Hazel sa primetime. At sa nalaman namang plano niya sa kanyang show, mukhang uusok sa kaseksihan ang primetime sa pagtatambal na ito nina Heart at Dennis.
Sexy, naughty with romance and comedy ang Juan Happy Love Story.
“I’m very excited but at the same time kinakabahan rin kasi naughty, sexy, love story ito,” pahayag ni Heart. “It’s very fresh so pampasaya siya ng buhay. Never pa ako nakagawa ng ganito and this role is very challenging. So thank you sa GMA for always giving me challenging roles.”
“Iba ito sa mga ginawa namin dati,” sabi naman ni Dennis. “Siguro mas medyo makulit ‘yung character ko ngayon.
Refreshing makagawa ng ganitong project, kaya salamat sa GMA dahil nabibigyan kami ng proyekto na hindi pa namin nagagawa before.”
Makakasama nina Heart at Dennis sina Ms. Gloria Romero at Mr. Nick Lizaso, Gardo Versoza, Lotlot de Leon, Ericka Padilla, Vincent Magbanua, Dominic Roco, Joross Gamboa at Kim Domingo.
Kailangan sigurong magpaalam ni Heart sa kanyang esposong si Sen. Chiz Escudero sa sexy scenes sa Juan Happy Love Story na ayon na rin mismo kay Hazel ay sobrang dami. (Dindo M. Balares)
