Tinatayang 24 na empleyado ng lokal na pamahalaan ng Binalbagan, Negros Occidental ang nagpositibo sa ilegal na droga matapos ang isinagawang drug screening nitong Pebrero, ayon sa alkalde ng bayan.
Sinabi ni Mayor Emmanuel Aranda na ang resulta ng pagsusuri kung saan kabilang sa mga nagpositibo ang ilang contractual at casual employees.
Humigit-kumulang 400 empleyado ng lokal na pamahalaan ang sumailalim sa drug testing noong ikalawang linggo ng Pebrero bilang bahagi ng kampanya ng munisipyo laban sa ilegal na droga.
Ayon sa alkalde, posibleng hindi na i-renew ang kontrata ng mga empleyadong nagpositibo. Hindi muna niya tinukoy ang mga partikular na posisyon ng mga sangkot.
Binatilyong nanonood ng liga, patay matapos makuryente sa poste ng basketball ring
Ipinaliwanag ni Aranda na isinagawa ang drug testing upang mapanatili ang disiplina, kredibilidad at integridad sa serbisyo publiko.
Layunin din umano ng lokal na pamahalaan na matiyak na nasusunod ng mga kawani ang pamantayang inaasahan sa mga lingkod-bayan.
Sa ngayon ay wala pang inanunsyong karagdagang administratibo o legal na hakbang laban sa mga empleyado. Hindi rin sinabi ng mga opisyal kung magkakaroon ng confirmatory tests.
Ilang lokal na pamahalaan sa bansa ang pana-panahong nagsasagawa ng drug testing sa mga empleyado bilang bahagi ng mga panloob na patakarang nakaayon sa pambansang kampanya kontra droga.
Ayon pa kay Aranda, bahagi ng patuloy na hakbang ang isinagawang screening sa Binalbagan upang mapalakas ang pananagutan sa hanay ng mga kawani ng pamahalaang bayan.
Inaasahan ang mga susunod na anunsyo habang nire-review ng munisipyo ang employment status ng mga nagpositibo at ang mga susunod na hakbang kasunod ng paglabas ng resulta.
