Isang imbakan ng mga live hand grenade ang nadiskubre sa loob ng isang pampublikong sementeryo sa bayan ng Lucban, Quezon, ayon sa ulat ng militar.
Ayon sa mga ulat, sinabi ng 2nd Infantry Division (2nd ID) ng Philippine Army na natuklasan ni Private First Class Bismarck Floyd Mandaing, kasapi ng 404th Ready Reserve Infantry Battalion, ang mga pampasabog habang bumibisita sa puntod ng kanilang pamilya sa sementeryo sa Barangay Palola.
Nakatanggap si Mandaing ng impormasyon na may hinihinalang explosive device na nakabaon sa loob ng isang malaking punong kahoy na bumagsak sa loob ng sementeryo.
Agad niyang sinuri ang lugar kasama ang kanyang mga kasamahan at nadiskubre ang kabuuang 120 piraso ng hand grenade na nakabaon sa ilalim ng lupa malapit sa punong kahoy.
PETA, umalma sa viral video ng sawa na ibinalibag sa daan sa Davao City
Ang mga narekober na pampasabog ay agad na siniguro at inilipat sa isang ligtas na lugar. Ipinadala rin ang isang Explosive Ordnance Disposal (EOD) team upang magsagawa ng security sweep sa paligid ng sementeryo at tiyakin ang kaligtasan ng mga bumibisita, gayundin ang wastong disposisyon ng mga granada.
Hindi naman tinukoy ng militar kung sino ang posibleng may-ari o responsable sa pagkakabaon ng mga pampasabog.
