“Ang kabayanihan ay hindi natatapos sa nakaraan,” ito ang ipinahayag ni Senate President Francis “Chiz” Escudero sa kaniyang mensahe bilang pagbibigay pag-alala sa mga kabayanihan ng mga Pilipino nitong Lunes, Agosto 25.
Sa maigsi ngunit siksik na mensahe ng Senate President sa kaniyang Facebook post, kinilala niya ang mga sakripisyong nailathala sa kasaysayan para sa kasarinlan ng Pilipinas at ang patuloy na pagbabayanihan ng mga Pilipino sa kasalukuyan.
“Ang kabayanihan ay hindi natatapos sa nakaraan. Hindi ito nasusukat sa mga pangalan sa monumento, aklat ng kasaysayan, o salaysay ng digmaan. Ito’y patuloy na isinusulat ng mga ordinaryong mamamayan—mga guro, manggagawa, magsasaka, sundalo, at frontliner. Sila ang mga Pilipinong araw-araw ay tahimik na naglilingkod sa bayan, may malasakit, may dangal, at may paninindigan,” paglalahad nito.
Binanggit din nito ang katungkulan pagsusulong ng mga batas na patuloy na ipaglalaban ang mga adhikain ng mga bayani noon at sa kasalukuyan.
'Flood control projects budget sa 2026, mas 'specific' sa foreign assisted projects!'—DBM Sec. Toledo
“Bilang mambabatas, tungkulin naming kilalanin at bigyang-boses ang kabayanihan ng bawat Pilipino. Sa Senado, isinusulong namin ang mga batas at patakarang nagpapalalim sa diwa ng demokrasya, katarungan, at pagkakapantay-pantay, mga adhikaing ipinaglaban ng ating mga bayani noon at ngayon.”
Sean Antonio/BALITA
