Tinawag ni Makabayan President Liza Maza ang administrasyon ni Pangulong Ferdinand “Bongbong” Marcos Jr. na “puro porma pero inutil” dahil sa patuloy umanong lumalalang kahirapan at kawalan ng pananagutan ng mga tiwaling opisyal ng gobyerno sa bansa.
“Puro porma pero inutil. Ganito ang administrasyon ni Pres. Marcos Jr. sa harap ng lumalalang kahirapan at korapsyon sa bansa at kawalang pananagutan ng mga tiwali at kriminal na opisyal ng gobyerno,” giit ni Maza sa isang pahayag nitong Biyernes, Enero 31.
“Kung naghahanap tayo ng tunay na kaunlaran at matinong pamamahala, wala tayong mahihita sa rehimeng ito. Puro yabang sa ampaw na paglago ng ekonomiya. Puro dada laban sa korapsyon pero walang hakbang sa pagpapanagot sa mga kurakot.”
Binanggit ng Makabayan president na bagama’t inulat ng Philippine Statistics Authority (PSA) na lumaki umano ang gross domestic product (GDP) nang 5.6% noong 2024, wala raw itong kabuluhan “para sa masa na walang trabaho at kung may trabaho ay sahod-alipin.”
Mga taong simbahan, dapat kasama sa mga laban ng bayan —Sister Mary John Mananzan
“Poverty under Pres, Marcos is the worst in the past two decades,” pagbibigay-diin ni Maza.
Ayon sa survey ng Social Weather Stations (SWS) na inilabas noong Enero 8, tumaas sa 63% ang mga pamilyang Pilipinong “mahirap” ang tingin sa sarili noong huling quarter ng 2024, kung saan ito raw ang pinakamataas na naitala mula sa 64% noong Nobyembre 2023.
Kaugnay nito, iginiit ni Maza na “kung tutuusin, mas masahol pa sa pandemya ang rehimeng Marcos at mga programa nito kung epekto sa kabuhayan ng mamamayan ang pag-uusapan.”
“Tuluy-tuloy ang pagsirit ng presyo ng pagkain, lalo na ang bigas, gayundin ng iba pang batayang bilihin gaya ng petrolyo. Bunga ito ng pagpapatuloy ni Pres. Marcos ng mga patakaran ng liberalisasyon, pribatisasyon at deregulasyon na lubhang paborable sa tubo ng negosyo habang pahirap sa masa,” ani Maza.
“Napakagalante ni Pres. Marcos sa mga dambuhalang negosyo, kabilang ang kanyang mga kroni at dayuhan. Panay ang bigay ng malalaking kontrata at proyekto at katakut-takot ang mga tax incentives. Pero ang kuripot sa manggagawa. Nasa kalahati lang ng cost of living ng isang pamilya ang minimum wage ngayon sa Metro Manila. Mas maliit pa nga ang sahod at mas mataas ang cost of living sa mas mahihirap na rehiyon gaya sa Mindanao,” dagdag niya.
Samantala, binanggit din ng senatorial aspirant ang umano’y maling paggamit sa P612.5 milyong confidential funds ng mga tanggapan ni Vice President Sara Duterte, at ang naging pahayag kamakailan ni Pangulong Marcos laban sa mga impeachment complaint na inihain laban sa bise presidente.
“Sa gitna ng napakalubhang kahirapan at gutom, kaliwa't kanan naman ang mga kaso ng paglustay sa kaban ng bayan. Si Pres. Marcos ang pinakamalaking hadlang sa pag-usad ng impeachment complaints laban kay VP Sara Duterte,” giit ni Maza.
“Imagine, milyun-milyong pondo ng bayan ang bigla na lang nawala habang milyun-milyong maralita ang hindi alam paano kakain, kung saan pupunta kapag nagkasakit, kung paano pag-aaralin ang kanilang mga anak. Kung para kay Pres. Marcos ay hindi ito sapat na batayan para i-impeach si VP Sara, wala tayong aasahang hustisya sa rehimeng ito. Kung di aaksyon si Pres. Marcos sa napakaliwanag na kaso ng katiwalian, sangkot sya mismo sa katiwalian. Di ito nakapagtataka sa mga Marcos na napakahaba ng kasaysayan ng pamilya sa pagnanakaw at pang-aabuso gamit ang estado poder.”
“Hindi dapat tumigil ang mamamayan sa paniningil sa rehimeng Marcos sa patung-patong nitong pananagutan. Collective action is the people's best hope to demand justice for the worsening poverty, corruption, and lack of accountability under the Marcos regime,” saad pa niya.
