Naghain ng endorsement ang Presidential Communications Office (PCO) sa Department of Justice (DOJ) upang imbestigahan at sampahan ng kaukulang kaso ang tatlong Facebook accounts na umano’y nagpapakalat ng maling impormasyon tungkol sa kalusugan ni Pangulong Ferdinand “Bongbong” Marcos Jr.

Sa isang pahayag na may petsang Abril 15, 2026, sinabi ng PCO, na sa pamamagitan ng Anti-Fake News Desk (AFND), kabilang sa tatlong FB accounts na kanilang papakasuhan ay sina Iloy Bugris: The Queen of Revelations, Rigondola Ping, at Crage Anderpal.

Saad pa ng nasabing dokumento, nanghihingi pa umano ng pera sa kaniyang social media followers ang Facebook account na si Iloy Bugris: The Queen of Revelation at nagbahagi ng isang dokumento hinggil sa kalusugan ni PBBM sa kaniyang live broadcast.

“The account "Iloy Bugris: The Queen of Revelations" conducted live broadcasts falsely claiming the President is critically ill and solicited financial contributions from viewers through posted GCash and BPI account details. During one broadcast, the administrator displayed a purported medical document that was fabricated,” saad ng PCO.

Tila mga larawan naman daw ang gamit ng account na si Rigondola Ping sa pagpuna ng kalusugan ng Pnagulo.

'We will comply!' SILG Remulla, kikilos na sa pag-aresto kay Sen. Bato

“The account "Rigondola Ping" posted manipulated images depicting the President in a state of physical distress — images that do not depict a real event and were designed to mislead the public,” saad pa ng PCO.

Sa sistema naman ng FB page na Crage Anderpal, iginiit ng PCO na tahasan umano itong nagpapakalat ng mga pekeng news graphics laban sa usapin ng kalusugan ni PBBM.

Ipinahayag din ng PCO na ang paghahain ng endorsement ay kasunod ng nauna nitong hakbang noong Abril 7, 2026 laban sa isa pang Facebook page na sangkot umano sa pagpapakalat ng maling impormasyon.

“The filing follows the PCO’s endorsement on 07 April 2026 for investigation the Facebook page "Malasakit News Pilipinas" for spreading fabricated reports about the national energy emergency. It also comes after the signing on 13 April 2026 of the Memorandum of Agreement among the DOJ, PCO, and the Department of Information and Communications Technology, formalizing inter-agency coordination in the investigation and prosecution of digital disinformation,” anila.

Binanggit din ang kamakailang paglagda sa isang Memorandum of Agreement sa pagitan ng DOJ, PCO, at Department of Information and Communications Technology (DICT) upang palakasin ang koordinasyon laban sa digital disinformation.

Binigyang-diin ng PCO na ang pagpapakalat ng maling impormasyon ay may kaakibat na pananagutan sa ilalim ng batas.

Ayon sa pahayag, “The deliberate fabrication and dissemination of false information — particularly during a declared State of National Energy Emergency under Executive Order No. 110 — is a crime under Article 154 of the Revised Penal Code, with penalties elevated when committed online under the Cybercrime Prevention Act.”