Umaabot na sa kabuuang 3,737 ang mga dagang nahuli ng mga residente sa lungsod ng Marikina, kasunod nang muling paglulunsad ng lokal na pamahalaan ng kanilang ‘Rat to Cash Program.’
Ayon kay Marikina City Mayor Marcelino Teodoro, nitong Huwebes lamang, ay aabot sa 2,211 ang mga dagang naisurender ng mga residente.
Inaasahan aniyang madaragdagan pa ang naturang bilang dahil habang isinusulat ang balitang ito ay ongoing pa ang pagbibilang ng mga daga.
Nabatid na aabot naman sa 1,526 ang mga dagang naisurender ng mga residente noong Miyerkules, Setyembre 14, na siyang unang araw pa lamang ng pag-arangkada ng programa o tinatayang aabot sa halagang ₱300,000.
Sa dami ng nagkakasakit: ER sa ilang ospital sa QC, puno na sa pasyente
Sinabi ng alkalde na ang programa, na unang inilunsad noong taong 2020, ay taun-taon na nilang isinasagawa ngayon upang maiwasan ang pagkalat ng leptospirosis.
Anang City Environmental Management Office (MECO), ang ‘Rat to Cash Program’ ay isasagawa nila hanggang ngayong Biyernes, Setyembre 16, lamang.
Sa ilalim ng programa, maaaring dalhin ng mga residente ang mga mahuhuling daga, buhay man o patay, sa CEMO compound sa Gil Fernando Avenue, Brgy. Sto. Nino, Marikina City mula alas-9:00 ng umaga hanggang alas-4:00 ng hapon, upang mabayaran ang mga ito.
Ang mga patay na daga ay maaaring ilagay sa selyadong plastic bag at container habang ang mga buhay naman na nasa mouse trap ay dapat ring ilagay sa plastic bag o kaya ay sa sako.
Ang mga ito ay susuriin at titimbangin ng CEMO, saka babayaran, depende sa laki at dami.
Tanging mga rehistradong residente lamang ng lungsod ang kwalipikadong lumahok sa programa.
Anila, kailangan ng mga residente na magdala ng balidong ID kung magsu-surrender ng nahuling daga.
