Hinikayat kahapon ng isang opisyal ng Commission on Elections (Comelec) ang mga magtutungo sa mga sementeryo na kuhanan ng litrato at i-post sa social media ang mga campaign poster ng mga “epalitiko”, o mga pulitikong magpapaskil ng kanilang mga larawan sa mga sementeryo ngayong Undas.
“Going to the cemetery? Might I suggest taking and posting pictures of political epal-ness? LOL,” tweet ni Comelec Spokesperson James Jimenez, na may hashtags na “#UndasUngas, #VoterEd, at #NLE2019.
Mismong si Jimenez ang nanguna sa pagpo-post ng mga campaign poster na nakita niya nang mapadaan ang opisyal sa Manila North Cemetery kahapon.
72 PDL's ng Manila City Jail, naka-enrol sa PUP Open University
Sa mga larawang ipinaskil ni Jimenez sa kanyang Twitter account, kabilang ang sa re-electionist na si Manila Mayor Joseph “Erap” Estrada at ng ka-tandem nitong si dating Cong. Amado Bagatsing, gayundin ang kay Buhay Party-list Rep. Lito Atienza.
Caption ni Jimenez: “Dumaan ako sa North Cemetery. May mga ‘nakikiisa’. #VoterEd #NLE2019.”
Una nang umapela si Jimenez sa mga kandidato na huwag samantalahin ang Undas, sa pamamagitan ng pagpapaskil ng kani-kanilang campaign poster at pagbati ng “Happy Undas” sa mga sementeryo.
Sa susunod na taon pa nakatakda ang campaign period para sa halalan sa Mayo 13, 2019.
-MARY ANN SANTIAGO
