MARIING itinanggi ni Congresswoman Vilma Santos-Recto ang nakarating sa amin na kesyo may offer daw sa kanya ang isang malaking produksiyon para pagsamahin silang dalawa ni Alden Richards sa pelikula.

Ayon pa kay Ate Vi, may naglatag lang daw sa kanya ng konsepto na posibleng magsama sa kanila ng pambatong aktor ng Kapuso network. Pero nilinaw kaagad ng Star for All Seasons na wala pang pormal na offer.

“No, wala, Jimi!!! May naglatag lang ng story. ‘Yun lang, nothing is final,”mensahe pa ng incumbent congresswoman ng Batangas.

Relasyon at Hiwalayan

Pagpapakasal dahil lang sa anak, 'di bet ni Janella Salvador

Dagdag pa rin naman ni Ate Vi, wala pa rin naman daw siyang ibinigay na commitment dahil sa ngayon ay nakatutok pa rin at mas binibigyan pa rin niya ng prioridad ang pagiging mambabatas.

Kumbaga, kung matuloy daw ang nasabing project at magkasundo sila ay maaaring gawin niya iyon, pero kung hindi ay sa susunod na mga pagkakataon na lang. Inaasam din naman daw ni Ate Vi na makasama sa isang project ang isang Alden Richards, huh!

Pero knowing Ate Vi, basta ba gusto niya ang isang project ay madali lang sa kanya na makagawa ng paraan. Medyo matagal-tagal na rin kasi na napanood ng lahat ang isang Ate Vi sa pelikula.

Sabik na sabik na rin naman ang mga Vilmanians na mapanood muli ang Star for all Seasons sa pelikula. Request pa ng mga ito na sana raw makagawa na rin si Ate Vi ng isang Maalaala Mo Kaya episode, huh!

Samantala, dahil kasalukuyang naka-recess ang Kongreso ay bising-busy pa rin si Cong. Vi sa pag-iikot sa mga constituents niya sa Lipa City. Kamakailan lamang ay si Ate Vi mismo ang nag-ribbon cutting sa ipinagawa niyang school building.

First termer pa lang si Ate Vi as congresswoman pero may mga nag-uudyok sa kanya ngayon na tumakbong senador, huh!