SAN LEONARDO, Nueva Ecija – Nagbanta si Department of Interior and Local Government (DILG) Usec. Emily Padilla na ipakukulong niya ang mga manlolokong gumagamit sa Mayor Rodrigo Roa Duterte-National Executive Coordinating Council (MRRD-NECC) para umano sa siguradong posisyon sa barangay.
Ayon kay Padilla, may rumaraket na nilalapitan ang mga taga-barangay para umano sa awtomatikong posisyon sa konseho, at kapag nagbayad ay tiyak nang may puwesto sa barangay council at may ID ng MRRD-NECC.
Batay sa impormasyon na natanggap ni Padilla, may mga nagbayad ng P1,000 hanggang P10,000 para sa siguradong posisyon bilang kapitan o kagawad ng barangay.
“Racket ‘yan! Ang mga umiikot ay nagpapaliwanag sa federalism. Walang ganyang pagbebenta ng posisyon,” paglilinaw ni Padilla. (Light A. Nolasco)
