Tutulak patungong Baku, Azerbaijan ang four-man Philippine boxing team para sumabak sa huling qualifying tournament para sa Rio Olympics.
Nakatakdang umalis Lunes ng hapon ang koponan na binubuo nina flyweight Ian Clark Bautista, bantamweight Mario Fernandez, welterweight Eumir Felix Marcial at light welterweight Dennis Galvan .
Ayon kay ABAP executive director Ed Picson, huling inihabol sa delegasyon si Galvan matapos tumanggi si Senador Manny Pacquiao na sumabak sa Olympic trial.
Filipino Olympian Hergie Bacyadan wagi kontra Chinese kickboxer; sinungkit gintong medalya
“We’re hoping for the best,” sambit ni Picson.
Umaasa si Picson na malaki ang pagbabago sa diskarte ng Pinoy boxer matapos sumalang sa pagsasanay ni Nonito Donaire Sr., ama ng kasalukuyang world super-bantamweight champion na si Nonito.
Si Donaire ay ilang beses ding humawak ng mga Amerikanong boksingero na matagumpay na nakasali sa koponan ng Estados Unidos sa quadrennial meet.
Malaki ang tyansa ng Pilipinas na madagdagan ang silya ng delegasyon sa boxing event dahil sa tikas ng Pinoy boxers.
Huling sumabak sa Olympic qualifying tournament para sa ABAP si Nesthy Petecio subalit agad itong nabigo sa kanyang pinakaunang laban sa World Women’s Championships sa Astana, Kazakshtan.
Una nang nakapagkwalipika sa Rio Games sina light-flyweight Rogen Ladon at lightweight Charly Suarez na kapwa naguwi ng silver medal sa Asia-Oceania Olympic Qualifying noong Marso 23. (Angie Oredo)
