Tutulak patungong US ang San Beda College sa Abril 24 para magsanay at lumahok sa pocket tournament bilang preparasyon sa darating na NCAA Season 92.
Naghahangad na mabawi ang titulo na naagaw sa kanila ng kanilang archrival Letran noong isang taon, magsasanay ang Red Lions sa Las Vegas Impact Basketball Program sa ilalim ng tanyag na trainer na si Joe Abumassar.
Ito na ang ika-apat na pagkakataon ng Red Lions na magsasanay sa Las Vegas sa nakalipas na limang taon.
Inaasahang pagkatapos ng training sa Las Vegas malalaman na ang final composition ng team na isasabak sa NCAA.
'Pikon daw?' UAAP fan na nag-dirty finger, agaw-eksena sa San Juan Arena!
Kabilang sa mga bagong miyembro na kasama sa Las Vegas sina Robert Bolick, Arnaud Noah, ang Fil- Am na si Davon Potts, William Navarro at Joe Presbitero.
Sila ang mga bagong mukhang babantayan at inaasahang makakabalikat ng mga beteranong sina Donald Tankoua, team skipper Dan Sara, Jeramer Cabanag at Jayvee Mocon sa misyong pagbawi ng korona sa men’s basketball sa NCAA.
(Marivic Awitan)
