Inaasahang makararanas ng mga pag-ulan ang malaking bahagi ng bansa ngayong Linggo, Agosto 4, dahil sa southwest monsoon o habagat, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA kaninang 4:00 ng madaling araw, malaki ang tsansang magdudulot ang habagat ng maulap na kalangitan na may kasamang kalat-kalat na pag-ulan at thunderstorms sa Western Visayas, Negros Island Region, Central Visayas, at Palawan.
Pinag-iingat ang mga residente sa mga nasabing lugar sa posibleng pagbaha o pagguho ng lupa tuwing magkakaroon ng malalakas na pag-ulan.
Bukod dito, malaki ang tsansang makararanas ng medyo maulap hanggang sa maulap na kalangitan na may kasamang pulo-pulong pag-ulan o thunderstorms ang Eastern Visayas at Mindanao bunsod din ng habagat.
Bam Aquino sa girian sa politika: 'Taumbayan na naman naiipit!'
Medyo maulap hanggang sa maulap na kalangitan na may kasamang pulo-pulong pag-ulan o thunderstorms din ang posibleng maranasan sa Metro Manila at mga natitirang bahagi ng bansa dahil naman sa localized thunderstorms.
Posible rin daw ang pagbaha o pagguho ng lupa sa mga nasabing mga lugar tuwing magkakaroon ng malalakas na thunderstorms.
Samantala, sa kasalukuyan ay may binabantayan ang PAGASA na kumpol ng kaulapan o cloud clusters sa labas ng Philippine area of responsibility (PAR), kung saan hindi raw nila inaalis ang posiblidad na mabuo ito bilang isang low pressure area (LPA).
