Naglabas ang Movie and Television Review and Classification Board (MTRCB) ng 14 araw na preventive suspension order laban sa dalawang programa ng Sonshine Media Network International (SMNI), isang media company na pagmamay-ari ni Pastor Apollo Quiboloy.

Sa isang pahayag, nag-isyu ang MTRCB ng suspensiyon laban sa SMNI programs na “Laban Kasama ang Bayan” at "Gikan Sa Masa, Para Sa Masa,” kung saan epektibo umano ito nitong Lunes, Disyembre 18.

“During the December 13 board meeting, a unanimous decision was reached to impose a 14-day preventive suspension on ‘Laban Kasama ang Bayan’ and a majority vote for ‘Gikan Sa Masa, Para Sa Masa.’ The decision aligns with the powers granted to the MTRCB by Presidential Decree No. 1986, ensuring that television programs adhere to contemporary Filipino cultural values,” pahayag ng MTRCB.

“Upon careful review and consideration of recent events and complaints received by the Board, it was found that certain aspects of the abovementioned programs may have violated the established guidelines and standards set by Presidential Decree No. 1986 and its Implementing Rules and Regulations (IRR) governing broadcasting content,” saad pa nito.

Ex-Pres. Rodrigo Duterte, nagpatutsada kay Rep. Castro

Ayon sa MTRCB, sinuspinde nito ang “Laban Kasama ang Bayan” dahil daw sa “unverified report” nito hinggil sa umano’y ₱1.8 billion travel funds ni House Speaker Martin Romualdez.

Matatandaang iginiit ni SMNI host Jeffrey “Ka Eric” Celiz sa telebisyon kamakailan na gumastos umano si Romualdez ng ₱1.8 bilyon sa kaniyang mga paglalakbay para sa 2023.

Samantala, sinuspinde rin ng ahensya ang "Gikan Sa Masa, Para Sa Masa" dahil naman umano sa “death threats” at “profane language” ng guests ng show sa dalawang episodes nito.

Matatandaang kamakailan lamang ay pinatutsadahan ni dating Pangulong Rodrigo Duterte sa naturang show si ACT Teachers Party-list Rep. France Castro, at sinabing gagamitin umano ng kaniyang anak na si Vice President Sara Duterte ang confidential at intelligence funds (CIF) nito para sa Reserve Officers’ Training Corps (ROTC) at upang ihinto umano ang communist insurgency sa bansa.

“Pero ang una mong target sa intelligence fund mo, ‘kayo, ikaw, France (Castro), kayong mga komunista ang gusto kong patayin,” ani Duterte kamakailan.

Kaugnay nito, naghain si Castro ng kasong kriminal laban kay Duterte, at kinalampag din ng mambabatas ang MTRCB na imbestigahan ang TV show at network kung saan sinambit ng dating pangulo ang “death threats” laban sa kaniya.