Mainit na panahon na may kaunting mga pag-ulan ang mararanasan sa malaking bahagi ng bansa ngayong Lunes, Disyembre 11, ayon sa Philippine Atmospheric, Geophysical and Astronomical Services Administration (PAGASA).

Sa Public Weather Forecast kaninang 4:00 ng madaling araw, ibinahagi ni Weather Specialist Benison Estareja na patuloy umano ang pag-iral sa bansa ng easterlies o ang mainit na hanging nagmumula sa karagatang Pasipiko.

“Kakaunti lamang ‘yung mararanasang mga pag-ulan, more on mga localized thunderstorms lamang,” ani Estareja.

Posible umano ang pagbaha o kaya nama’y pagguho ng lupa sa mga lugar kung saan magkakaroon ng malalakas na thunderstorms.

Sa kasalukuyan ay wala naman umanong binabantayan ang PAGASA na low pressure area (LPA) o bagyo sa loob o labas ng Philippine area of responsibility (PAR).