Arestado ang isang traffic enforcer ng Metropolitan Manila Development Authority (MMDA) dahil umano sa pangongotong sa may-ari ng isang trucking company sa Port Area, Maynila nitong Biyernes, Marso 31.
Nakakulong na sa National Capital Region Police Office-Regional Special Operations Group (NCRPO-RSOG) ang suspek na si Rey Gaza, 53, nakatalaga sa Northern Traffic Enforcement Division-Traffic Reaction Unit ng MMDA.
Sa police report, hindi na nakapalag ng suspek matapos damputin ng mga tauhan ng NCRPO-RSOG at MMDA-Intelligence and Investigation Office (IIO) sa Port Area, Maynila nitong Marso 31 matapos tanggapin ang marked money na ₱5,000 mula sa complainant na si Salvador Jecino.
Sa pahayag ni Jecino, nangongolekta umano sa kanya si Gaza at mga kasabwat nito ng ₱10,000 na "payola" kada buwan mula noong 2019 upang hindi umano maabala ang operasyon ng trucking company nito sa North Harbor at Valenzuela.
Marikina LGU: Ulat na dinukot ang 4 na menor de edad sa lungsod, fake news!
Inihahanda na ng pulisya ang kasong robbery extortion at paglabag sa Republic Act 3019 o Anti-Graft and Corrupt Practices Act laban sa suspek.
