PLANO ng National Academy of Sports (NAS) na gawing modelo ang programa na ginagamit ng Singapore Sports School (SSS) at ng Australian Institute of Sport (AIS) para makalikha ng mahuhusay at world-class Filipino student-athletes.
Sinabi ni NAS executive director Prof. Josephine Reyes na seryoso nilang sinusuri at pinag-aaralan ang nasabing dalawang institusyon sa paggawa ng kanilang curriculum sa paaralan na idinisenyo para ma-integrate ang academic at sports programs sa isang world-class environment.
“I’m thinking of visiting the Singapore Sports School to benchmark its system as well as other schools that have similar models,” ani Reyes, head ng Philippines Sports Commission’s Sports Physiology Unit.
Naging mahalaga ang programa ng Singapore Sports School sa paghubog sa kanilang mga atleta mula sa average performer sa Southeast Asian Games para maging isang sports power sa rehiyon at sa mundo.
Bukod sa bronze medal: Elijah Cole, kinakiligan sa face card pati 'pangalan' niya
Matapos itatag ng Singapore ang sports school nito noong 2004, naging kompetitibo ang Singapore sa SEA Games at nakapagwagi ng gintong medalya sa Olympic swimming sa pamamagitan ni Joseph Schooling .
Ang Pilipinas ay may populasyon na mahigit sa 100 milyon kumpara sa populasyon ng Singapore na 5.7 milyon. Tungkol naman sa Australian Institute of Sport, sinabi ni Reyes na matagal nang in-adopt ng PSC ang Canberra-based institute’s talent identification program.
"AIS has created elite programs that we want to adopt. In fact, our own sports talent identification program was conceptualized based on their talent-search program,” ani Reyes.
Ang AIS ay isang high-performance sports training institution na itinatag ng gobyerno ng Australia noong 1981. Mula noon, nagtamo na ang Australia ng 86 gold medals sa Olympics.
Bert de Guzman
