MGA lokal players at imbitadong Fil-foreign swimmers ang unang grupo na bibinyag sa bagong tayong world-class Aquatics Center sa New Clark City sa Capas, Tarlac bago ganapin ang hosting ng 30^th Southeast Asian Games sa Nobyembre.

Ipinahayag ni Philippine Swimming Inc. (PSI) president Lani Velasco nitong Biyernes na pinayagan sila ng Philippine SEA Games Organizing Committee (PHISGOC) na gamitin ang pasilidad para sa ilalargang Philippine National Open sa Aug. 31 hanggang Sept. 3.

Ang torneo ang magsisilbing final qualifying para sa pagpili ng mga atleta na bubuo sa Philippine Team na isasabak sa SEA Games.

National

50.78% examinees, pasado sa Nov. 2024 Licensure Exam for Agriculturists

Pangungunahan nina SEAG veteran Jessie Lacuna at Jasmine Alkailde ang swimming hopefuls na magtatangkang makapagbigay ng gintong medalya sa Team Philippines sa unang pagkakataon matapos ang ilang edisyon na kabiguan sa biennial meet.

Kumpirmado ring makikisa ang mga recruit sa abroad na sina  Jimmy Deiparine, Luke Gebbie, Thomas Peregrina, Jerard Jacinto, Remedy Rule at Georgia Peregrina, gayundin ang mga datihan sa training pool na sina  Rosalee Mira Santa Ana, Roxanne Ashley Yu at Chloe Isleta.

Pangungunahan naman ang mga up-and-coming Nationals nina age-group internationalist Micaela Jasmine Mojdeh at katropa niya sa Swim Pinas na sina Jules Mirandilla, Jordan Ken Lobos, Marcus De Kam, John Neil Paderes, at Yohan Cabana.

Ang 13-anyos na si Mojdeh, freshman sa Brent International, ang tanging Pinay na nagwagi ng gintong medalya sa kampanyan ng Team Philippines sa HongKong Open may isang linggo na ang nakalilipas.

Ang National junior record holder ay nagwagi sa women’s 200-meter butterfly sa tyempong 2:20.01 laban sa beteranong kasangga na Rosalee Mira Santa Ana  (2:20.06) at SEA Games campaigner Sounthourchoke Supasuta ng Thailand (2:20.91) sa dikdikang finale.

Batay sa inilabas na regulasyon ng PSI, ang mangungunang dalawang swimmers sa kani-kanilang event at sigurado na sa RP Team sa SEAG.