NANATILI sa pedestal ng women’s badminton si Sarah Joy Barredo, habang nangibabaw si Rabie Jayson Oba-ob sa men’s open singles sa katatapos na 11th Prima Badminton Championships nitong Linggo sa Powersmash Badminton Court sa Chino Roces Avenue, Makati City.
Ginapi ng 18-anyos na si Barredo ang karibal at kapwa National na si Airah Mae Nicole Albo, 21-16, 21-13, para makamit ang ‘three-peat’ sa torneo na sanctioned ng Philippine Badminton Association (PBA) at Philippine National Ranking System (PNRS).
Matapos pabagsakin si defending champion Malaysian Shahrul Shazwan (22-20, 21-14) sa semifinals, nakumpleto ni Oba-ob ang dominasyon nang pabagsakin si Michael Kevin Cudiamat, 22-20, 21-8, para sa kampeonato sa men’s open singles.
6 koponan nagbabalak ligwakin ang PVL; lilipat daw sa bagong liga?
Itinataguyod ang torneo ng Babolat, SMART Communications, Boysen Paints, Morning Star Milling Corporation., Mabz Builders, ILO Construction, Monocrete Construction, Pioneer Insurance, Promax International, Regent Foods Corp., RFM Corp at Del Monte Phils.
Nakamit naman ni Jewel Angelo Albo ang dalawang singles title. Naungusan niya si Lyrden Laborte, 18-21, 21-12, 21-8, sa boys’ singles Under-19 crown, gayundin sa boys’ singles U-17 finale.
Ginapi ni Rey Angelo Pedron si Munir Bartolome, 17-21, 21-19, 21-14, para sa boys’ singles U-15 title, habang namayani si Aldreen Rae Concepcion kay Mikaela Joy De Guzman, 16-21, 21-11, 21-19, sa girls’ U-19 diadem.
Nagwagi naman si Athea Marie Gonzalez kay Viana Meryl Antonio 21-15, 22-20, para sa girls’ singles U-17, habang nanaig si Angela Valle kay Athena Sonota, 21-14, 21-18, sa girls’ U-15 title.
Ang iba pang kampeon sa torneo na inorganisa ni Prima Pasta chairman Alex Lim ay sina Zeth Javier Quiambao (boys’ 13-U); Wijel Angelo Albo (boys’ U-11); Angelina Katrina De Guzman Vitangcol (girls’ U-13); at Gianna Gonzalez (girls’ U-11).
