Pinagnakawan na, pinatay pa!
Pinatay ang isang 62-anyos na negosyanteng bading sa loob mismo ng kanyang tahanan sa Sta. Ana, Manila, kahapon ng umaga.
Nakagapos ang mga kamay, may busal ang bibig, at hinihinalang namatay sa suffocation si Leonardo Simplicio, alyas “Mommy Joy”, residente ng 2243-B Eloriaga, Augusto Francisco St., sa Sta. Ana, Maynila.
Sa ulat ni SPO2 Richard Escarlan, imbestigador ng Homicide Section ng Manila Police District (MPD), dakong 10:00 ng umaga nang madiskubre ni Vincent Antonio, isa sa mga pinag-aaral ng biktima, ang bangkay ni Simplicio.
50.78% examinees, pasado sa Nov. 2024 Licensure Exam for Agriculturists
Manghihiram umano sana si Antonio ng pera mula sa biktima kaya’t umaga pa lamang ay una na niyang pinapunta sa bahay nito ang kanyang kapatid, ngunit bumalik din umano ito agad at sinabing tulog pa ang biktima.
Binalikan umano ni Antonio si Simplicio ngunit laking gulat nang madiskubreng nakabulagta at agad niyang ipinaalam sa mga kinauukulan.
Hinala naman ng mga awtoridad na namatay sa suffocation ang biktima dahil walang anumang sugat na natagpuan sa katawan nito.
Gayunman, bukod sa busal nito sa bibig ay may sinturon ding mahigpit na nakapulupot sa kanyang bibig hanggang sa ilong.
Naniniwala rin ang mga awtoridad na pagnanakaw ang motibo ng nasa likod ng krimen dahil nawawala ang tatlong cellphone at iba pang gadget ng biktima, gayundin ang ‘di pa matukoy na halaga ng salapi.
Ayon sa kapitbahay ng biktima, tumangging magbigay ng pangalan, ang nagsabi na bago nadiskubre ang bangkay ng biktima ay may namataan siyang limang lalaking nakatayo sa harapan ng bahay nito dakong 2:00 ng madaling araw.
Kasalukuyang nagsasagawa ng follow-up operation ang mga awtoridad upang maresolba ang krimen. (Mary Ann Santiago)
