Hindi na pinaporma ng National University Bullpups ang La Salle Zobel Junior Archers tungo sa 96-75 demolisyon para makopo ang kampeonato sa UAAP Season 78 juniors basketball Biyernes ng gabi sa San Juan Arena.
Mula sa 22-9 na kalamangan sa pagtatapos ng first canto,nakuha pang maghabol ng Junior Archers sa pamumuno ni season MVP Aljun Melecio na kumana ng 14 na puntos kabilang ang apat na 3-pointers sa second period para itala ang iskor na 31-33.
Ngunit, naglatag ang Bullpups ng 28-3 run sa pagsasara ng first half upang makontrol ang laro sa 73-40 bentahe.
Classic movie ‘Ipaglaban Mo!’, ipinalabas ng CCP bilang kampanya vs VAWC
Mula roon, hindi na lumingon ang Bullpups at tuluyang kumaripas para makopo ang ikatlong titulo sa limang final appearance sa pangangasiwa ni coach Jeff Napa.
Ibinuhos ng NU ang lahat matapos silang mabigo sa Game 2, 60-71, kung saan naputol ang makasaysayan nilang 15-sunod na panalo kabilang ang 14-game sweep ng elimination.
Nahirang bilang finals MVP ang 6-foot-9 at tubong Mabalacat, Pampanga na si Justine Baltazar na nag-average ng 16 puntos, 20.3 rebounds at tatlong block sa serye.
Nagtapos si Baltazar sa laro na may 18 puntos, 14 rebound at apat na block.
“At least, nag-send ng strong message ‘yung team. Pinakita nila na deserving sila mag-champion,” pahayag ni Napa. (Marivic Awitan)
