Aabot sa 50 lalawigan ang posibleng maapektuhan ng tagtuyot o dry spell ngayong buwan, dahil na rin sa El Niño na nararanasan sa bansa.
Ito ang inihayag kahapon ng Philippine Atmospheric, Geophysical and Astronomical Services Administration (PAGASA).
Kabilang sa mga lugar na inaasahang makararanas ng drought ay ang Zamboanga del Norte, Zamboanga del Sur, Zamboanga Sibugay, Bukidnon, Lanao del Norte, Misamis Occidental, Compostela Valley, Davao del Sur, Davao Oriental, South Cotabato, North Cotabato, Sarangani, Sultan Kudarat, Basilan, Maguindanao, Lanao del Sur, Sulu, at Tawi-Tawi, pawang sa Mindanao.
Maaapektuhan din ng tagtuyot ang Rizal, Palawan, Catanduanes, Antique, Capiz, Guimaras, Iloilo, Negros Oriental, Siquijor, Eastern Samar, Northern Samar, at Western Samar.
Pusa hinagis sa dagat para sa content; dalawang menor de edad, timbog
Asahan din ang dry spell sa Abra, Benguet, Ifugao, Kalinga, Mountain Province, Pangasinan, Nueva Vizcaya, Nueva Ecija, Oriental Mindoro, Romblon, Albay, Camarines Sur, Masbate, Sorsogon, Bohol, Camiguin, Misamis Oriental, Agusan del Norte, Agusan del Sur, at Surigao del Norte.
Paliwanag ng PAGASA, kapag nakaranas ng tatlong magkakasunod na buwang “below normal” na pag-ulan sa isang lugar ay senyales na ito ng tagtuyot.
Gayunman, binanggit ng PAGASA na batay sa climate outlook ng ahensiya, unti-unti nang hihina ang El Niño pagsapit ng Mayo. (ROMMEL TABBAD)
