NAPILI bilang isa sa finalists ang Rated K ni Korina Sanchez-Roxas sa Biography/Profiles category ng prestihiyosong New York Festivals World’s Best TV & Films para sa espesyal na report ni Koring ukol kay Rochelle Pondare.
Si Rochelle ay isang batang may progreria, isang rare na karamdaman na mabilis ang manipestasyon ng pagtanda sa murang edad ng mga bata.
Tubong Bulacan si Rochelle Pondare, ang kaisa-isang pasyente na may karamdamang progeria sa Pilipinas na umabot ng 15 taong gulang.
ALAMIN: Mga inisyatibo ng NCCA sa pagpapakilala ng kultura ng mga katutubo
Ayon sa mga pag-aaral, maaaring mabuhay ang isang taong may progeria ng 12 hanggang 15 na taon. Halos 144 taon na ang tanda ng katawan ni Rochelle ngunit siya ay masiglang-masigla at mayroon din siyang boyfriend.
Ang isa sa mga pangarap ni Rochelle na magkaroon siya ng bahay at lupa para sa kanyang sarili at sa kanyang ina at ito ay kanyang nakamit sa tulong ng Rated K.
“Ito naman talaga ang dahilan kung bakit namin pinag-iigihan ang bawat episode ng Rated K,” kuwento ng misis ni Mar Roxas. “Nais naming bigyan ng pag-asa ang bawat Pilipino sa pamamagitan mga ekstraordinaryong istorya ng mga ordinaryong Pilipino. Ang mga katulad ni Rochelle ang nagsisilbing isnpirasyon sa amin na ipagpatuloy at pagbutihan pa ang aming trabaho.”
Nagwagi rin kamakailan ang Rated K, napapanood tuwing Linggo ng gabi, bilang Best Magazine Show at si Korina bilang Best Magazine Show Host sa katatapos na PMPC Star Awards for TV at isa rin ang Rated K sa Top 10 most watched TV shows sa buong bansa ayon sa pinakahuling national survey ng Kantar Media. (ADOR SALUTA)
