BAGUIO CITY – Masusing iniimbestigahan ng pulisya ang pagpatay sa isang babaeng single parent na natagpuang wala nang buhay sa loob ng silid sa isang hotel sa Marcos Highway sa siyudad na ito.
Nagtamo ng mga saksak sa iba’t ibang bahagi ng katawan si Mercy Dagyen Mapili, 25, ng Itogon, Benguet, at nakabalot ng kumot nang matagpuan ng mga nagrespondeng pulis at mga tauhan ng Scene of the Crime Operations (SOCO), dakong 3:55 ng hapon nitong Huwebes.
Ayon sa inisyal na imbestigasyon, hindi nakilala ang lalaking kasama ng biktima nang pumasok ito sa hotel dakong 4:22 ng umaga nitong Huwebes. Hindi na umano namalayan ng mga hotel worker ang paglabas ng lalaking kasama ng biktima.
Nadiskubre ang bangkay ng biktima ni Danilo Doque, security guard ng hotel, matapos puntahan ng isang kawani ang silid nito para linisin. (Rizaldy Comanda)
