Apat na tulak ng ilegal na droga, kabilang ang tatlong konduktor ng bus, ang naaresto ng mga tauhan ng Philippine Drug Enforcement Agency (PDEA) sa buy-bust operation sa San Pedro City, Laguna.
Kinilala ni PDEA Director General Arturo Cacdac Jr. ang mga naaresto na sina Erwin Reyes, 28, ng Biñan, Laguna; Soun Leandro, 33, ng Barangay Olympia, Makati City; Adrian Almenzana, 33, ng Biñan, Laguna, pawang konduktor ng bus; at Vicente Detaro, 48, ng Pacita Complex, San Pedro City, Laguna.
Lumitaw sa imbestigasyon na bandang 3:00 ng hapon nang magsagawa ng buy-bust operation ang mga operatiba ng PDEA Regional Office 4-A, sa pamumuno ni Director Adzhar A. Albani, sa Detaro Compound sa Pacita Complex, na nagresulta sa pagkakaaresto sa apat matapos maaktuhang nagbebenta sa police agent ng limang plastic sachet ng shabu.
Ang mga arestadong shabu dealer ay nakumpiskahan din ng iba’t ibang drug paraphernalia.
