“Lulukuban ka niya sa lilim ng kanyang malapad na pakpak, at sa kalinga niya ay palagi ka ngang nakakatiyak; iingatan niya't ipagsasanggalang, pagkat siya'y matapat.” – Mga Awit 91:4
Ang bersong ito ang paalala na kahit sa gitna ng mga panganib, ang Diyos ay tapat na tumutugon sa pagtawag natin.
Sa Kaniyang katapatan, binibigyan Niya tayo ng lakas ng kalooban habang iniingatan tayo sa masama (2 Tesalonica 3:3).
Dahil dito, huwag mangamba, kahit na ang bansa nati’y kasalakuyang kumakaharap sa pagsalanta ng mga bagyo, ang presensiya ng Panginoon ang babalot sa atin.
#KaFaithTalks: Ang Diyos na nagluluksa para sa atin
Sa pagkalinga Niyang ito, walang panganib, walang bagyo, o pagsubok man, ang makapagdudulot sa atin ng sakit, dahil sa pag-iingat Niya, tinitiyak Niyang malalampasan natin ang mga ito nang matagumpay at mayroong pagpapasalamat.
Ipinangako ng Panginoon na mayroong mga anghel na nakasunod sa atin saan man tayo magdako, na hahawak sa atin at magtitiyak sa ating kaligtasan.
“Sa kanyang mga anghel, ika'y itatagubilin, saan mang dako maparoon, tiyak kang iingatan. Sa kanilang mga kamay, ika'y aalalayan, ang sa mga bato, paa mo'y hindi masasaktan.” – Mga Awit 91:11-12
Sa panahon ng pangangailan at sakuna, panghawakan din ang mga bersong ito mula sa Mga Awit 91:1-16:
1 Siyang naghahangad ng pagkupkop ng Kataas-taasan, at nananatili sa pagkalinga ng Makapangyarihan,
2 ay makakapagsabi kay Yahweh:
“Muog ka't kanlungan, ikaw ang aking Diyos, ang Diyos na tangi kong pinagtiwalaan.”
3 Sa panganib at bitag ika'y kanyang ililigtas, at kahit ano mang matinding salot ay di ka magdaranas.
4 Lulukuban ka niya sa lilim ng kanyang malapad na pakpak,
at sa kalinga niya ay palagi ka ngang nakakatiyak;
iingatan niya't ipagsasanggalang, pagkat siya'y matapat.
5 Pagsapit ng gabi, di ka matatakot sa anumang bagay,
maging sa gagawing biglaang paglusob ng mga kaaway.
6 Ni sa ano pa mang darating na salot pagkagat ng dilim,
sa pagpuksa'y wala kang takot, sa araw man dumating.
7 Kahit na mabuwal sa iyong harapan ang sanlibong tao,
sa iyong paligid ang bilang ng patay maging sampung libo;
di ka matatakot, at natitiyak mong di ka maaano.
8 Ika'y magmamasid at sa panonood, mapapatunayan,
iyong makikita, taong masasama'y pinaparusahan.
9 Sapagkat si Yahweh ang iyong ginawang tagapagsanggalang,
at ang pinili mong mag-iingat sa iyo'y Kataas-taasan.
10 Di mo aabuting ika'y mapahamak; di mararanasan
kahit anong uring mga paghihirap sa iyong tahanan.
11 Sa kanyang mga anghel, ika'y itatagubilin,
saan mang dako maparoon, tiyak kang iingatan.
12 Sa kanilang mga kamay, ika'y aalalayan, nang sa mga bato, paa mo'y hindi masasaktan.
13 Iyong tatapakan kahit mga ahas o leong mabagsik,
di ka maaano sa mga serpiyente't leong mababangis.
14 Ang sabi ng Diyos, “Ililigtas ko ang mga tapat sa akin,
at iingatan ko ang sinumang taong ako'y kikilanlin.
15 Kapag sila'y tumawag, laging handa ako na sila'y pakinggan,
aking sasamahan at kung may problema ay sasaklolohan;
aking ililigtas at ang bawat isa ay pararangalan.
16 Sila'y bibigyan ko't gagantimpalaan ng mahabang buhay,
at nakakatiyak, tatamuhin nila aking kaligtasan!”
Sean Antonio/BALITA
